Кениядан пластик жейтін жаңа жәндік түрі табылды

Кениядан пластик қалдықтарын жейтін жәндік түрі табылды. Африкадан алғаш рет осындай ерекше қабілетке ие жәндік анықталып отыр. Халықаралық жәндіктер физиологиясы және экологиясы орталығының ғалымдары кениялық ұн құртының дернәсілдері полистиролды тұтына алатынын және олардың ішектерінде бұл материалды ыдыратуға көмектесетін бактериялардың бар екенін анықтады.

Полистирол, көбіне пенопласт ретінде танымал, азық-түлік, электроника және өнеркәсіптік орауыштарда кеңінен қолданылады және ұзақ уақыт бойы ыдырамайды. Химиялық және термиялық қайта өңдеу әдістері қымбат әрі қоршаған ортаға зиян келтіруі мүмкін болғандықтан, ғалымдар осы тұрақты пластик қалдықтарымен күресудің биологиялық әдістерін іздестіруге мүдделі болды.

Анықталған құрт – Alphitobius жәндігінің дернәсілі. Бұл жәндік негізінен жылы және азық қоры мол құс фермаларында тіршілік етеді. Олардың полистиролды тұтыну қабілеті зерттеушілерге пластик қалдықтарын биологиялық жолмен ыдыратудың жаңа мүмкіндіктерін ашады.

Аталған зерттеу ерекше маңызды, себебі ол Африкадағы жәндіктердің пластикті ыдырату қабілетін зерттеуге бағытталған алғашқы жұмыстардың бірі болып отыр. Африкадағы жәндіктер мен қоршаған орта жағдайларының өзге өңірлерден айырмашылығы пластик қалдықтарын өңдеуде жаңа әдістер мен шешімдер ұсынуы мүмкін.

Ғалымдар болашақта полистиролды ыдырататын бактерияларды анықтау және олардың ферменттерін өндірістік деңгейде қолдану мүмкіндігін зерттеуді жоспарлап отыр.