Алматы облысының тұрғыны бір үйір жылқы ұрлады деген күдікке ілінді (ВИДЕО)

Келтірілген шығын 12 миллион теңгені құрады.

Жамбыл ауданының полицейлері Ақсеңгір ауылында тұратын азаматтың жайылымда жүрген 14 бас жылқысын ұрлады деген күдіктіні ұстады, деп хабарлады turkystan.kz. – Оқиға 7 қарашада 39 жастағы жергілікті тұрғын 14 бас жылқының жоғалып кеткенін мәлімдеген кезде белгілі болды. Келтірілген шығын 12 миллион теңгені құрады. Аталған дерек бойынша қылмыстық іс қозғалып, жедел-іздестіру іс-шаралары ұйымдастырылды, – деп атап өтті Жамбыл аудандық полиция бөлімінің бастығы Асхат Данияр. Жедел-іздестіру іс-шаралары нәтижесінде полиция қызметкерлері «ізін суытпай» күдіктінің жеке басын анықтады, ол жәбірленушінің ауылдасы болып шықты. – Күдікті ұрланған малдарды сатып үлгерген. Қазіргі уақытта жәбірленушіге жылқылардың бір бөлігі қайтарылды, ал ұрланған малды сатып алушыға қатысты тексеру жүргізілуде, – деп толықтырды А.Данияр. Күдіктіге қатысты сот «қамауда ұстау» шарасын белгіледі. Полиция ер адамның басқа осыған ұқсас қылмыстарға қатысы бар-жоғын тексеріп жатыр. Тергеу жалғасуда.