Астана – жастардың қаласы
Халықаралық студенттер күніне орай Астанада Жастар саясаты мәселелері басқармасы жыл сайынғы Jastar Jalyny-2024 студенттік фестивалін ұйымдастырып жатыр. Іс-шара елордада 5-14 қараша аралығында өтеді.
Фестивальдің ашылу салтанаты студенттердің өз оқу орнын таныстырудан басталды. Әр күн белгілі бір номинацияға арналған: футбол, волейбол, үстел теннисі, шахмат, эстрада, ұлттық би, заманауи би, ұлттық аспаптар (домбыра), театр, мобилография. – Jastar jalyny фестивалі жастардың шығармашылық әлеуетін ашу, талантты жастарды анықтау, дарынды балаларды демеу, жастардан құралған ұжымдардың шығармашылық дамуына қолдау көрсету, жағдай жасау, рухани әрі мәдени әлеуетін дамыту, студенттерге эстетикалық және этикалық тәрбие беру жүйесін жетілдіру, азаматтық, әлеуметтік жауапкершілік, патриоттық сезім, адамгершілік құндылықтар мен көшбасшылық қасиеттерді арттыру мақсатында өткізіліп келеді, – деді Жастар саясаты мәселелері басқармасының баспасөз хатшысы Әнел Мансұрова. Жоғарыда аталған әр номинация бойынша жүлделі орынға ие болған қатысушыларға қаржылай сыйлықтар қарастырылған. І-орынға 100 мың, ІІ-орынға 70 мың, ІІІ-орынға 50 мың теңге ақшалай жүлде қарастырылған. Ал жоғарыда аталған 10 номинация бойынша ең үздік атанған жоғары оқу орнына бас жүлде – 500 000 теңге беріледі. – Биылғы фестиваль жастардың шығармашылыққа, өнерге, спортқа қызығушылығын арттыруға басымдық беріп отыр. Жастардың бір-біріне достық, сыйластығын дамыту – мақсатымыз. Жалпы, елордада жыл сайын жастардың саны өсіп келеді. Мәселен, былтыр қаламыздағы студенттердің саны 75 мыңнан асса, биыл бұл көрсеткіш 95 мыңнан асып жығылды. Яғни, Астана мемлекеттік қызметшілер қаласынан жастардың қаласына айналып жатыр деген сөз. Бұл бізді қуантады. Астана қаласы әкімдігінің Жастар саясаты мәселелері басқармасы жастарға үлкен жауапкершілікпен қарап, олардың сұранысы бойынша аталған фестивальді өткізіп келеміз, – деді Астана қаласы Жастар саясаты мәселелері басқармасының бас маманы Ерлан Айдаров. Ұйымдастырушылардың айтуынша, осы жылғы фестивальдің ерекшелігі – спорттық номинациялардың қосылуы. – Биыл фестиваль өзгеше форматта өтуде. Жарысқа спорттық ойындардың қосылуы ерекше әсер беріп отыр. Футбол, волейбол, үстел теннисі, шахмат және студенттердің сұранысы бойынша мобилография номинациясы қосылды. Мобилография – жастар арасында танымал, үлкен сұранысқа ие қызмет түрінің бірі. Мобилографтар үшін биылғы тақырып – жұмысшы мамандықтар. Яғни, коммуналдық мекемелердің қызметкерлері, автобус жүргізушілері, сонымен қатар тағы да басқа жұмысшы мамандықтарды жақсы жағынан дәріптеу, олардың жұмысын көрсету. Сонымен қатар биыл ұлттық аспаптар номинациясы бойынша біз басты назарды домбыраға қойып отырмыз. Осылайша, елорданың барлық ЖОО-ның студенттері домбырадан сайысқа түсіп, бақ сынасатын болады. Студенттердің қызығушылығы өте жоғары. Бұл мереке жастар асыға күтетін шығармашылық, спорттық сайыс түріне айналып келе жатыр. Сонымен қатар ата-аналар да бізді қолдайды, жылы пікірлерін аямайды. Бұл да біз үшін – үлкен жетістік, – деді Ерлан Нұрланұлы. Jastar Jalyny-2024 студенттік фестивалінің марапаттау кеші Астана қаласының Жастар сарайында 14 қарашада өтеді. Концертте елімізге танымал әншілер өнер көрсетеді. Әр номинация бойынша жүлделі орын алған студенттер де өз өнерлерін ортаға салады. Ұйымдастырушылар гала-концертке барша қала тұрғындары мен қонақтарын шақырады.
А.БИМЕНДИЕВА