Алматыда жасөспірімді пышақтап кеткен ер адам сотталды
Айыпталушы «Бұзақылық» бабы бойынша төрт жылға бас бостандығынан айырылды.
15 мамырда Түрксіб ауданында ішімдікке тойып алған ер адам 15 жастағы жасөспірімді үй маңайында досымен бірге мопед мініп жүргені үшін пышақтап кеткен. Жасөспірім ауруханаға жатқызылды. Дәрігерлер баланың жолы болғанын, оның сан артериясы мен маңызды мүшелері зақымданбағанын айтты.
Баланың сыныптастары қаскүнемді полициядан қашып кетпесі үшін үйінің жанында бақылап, ұстауға көмектескен. Бірақ полиция ер адамды ұстамай, үйіне жіберген.
Аталған жағдайға қатысты «Денсаулыққа қасақана ауырлығы орташа зиян келтіру» бабы бойынша қылмыстық іс қозғалды.
Қыркүйек айында қылмыстық іс толығымен әкімшілік іске айналды. Мұндай жағдайда күдікті 55 мың теңге айыппұлмен құтылып кетуі мүмкін еді. Сондықтан жәбірленушінің отбасы істі қайта қарауды талап етті.
Осылайша айыпталушы «Бұзақылық» бабы бойынша төрт жылға бас бостандығынан айырылды. Сондай-ақ ол жәбірленушінің отбасына бір миллион теңге көлемінде моральдық шығын төлеуге міндеттелді.