3 жасқа дейін қантты аз тұтынған баланың есейгенде қант диабетіне шалдығу қаупі төмен болады – зерттеу

Балалардың 3 жасқа толғанға дейін ағзасында қант мөлшері көп болуы олардың өмір бойы 2-типтегі қант диабеті мен қан қысымының арту қаупін тудыруы мүмкін. Мұндай қорытындыға Калифорнияның Оңтүстік университеті, Берклидегі Калифорния университеті және Канададағы Макгилл университетінің ғалымдары келді. Зерттеушілер Ұлыбританиядағы соғыс уақытындағы қантты мөлшерлеу туралы мәліметтер базасын пайдаланып, қантты ерте тұтынудың ұзақ мерзімді әсерін зерттеді.

Зерттеуде 1951-1956 жылдар аралығында дүниеге келген 60 183 адамның денсаулығы туралы деректер талданды. Соғыс кезеңінде, яғни 1940 жылдан 1953 жылға дейінгі аралықта Ұлыбританияда әрбір ересек адам күніне 41 грамм қантпен шектелген, ал екі жасқа толмаған балаларға қант тұтынуға тыйым салынған еді. Режим аяқталғаннан кейін, қант тұтыну айтарлықтай артты.

«Біз қанттың денсаулыққа әсерін ұзақ мерзімді кезеңде зерттегіміз келгенде, адамдардың өмірінің ерте кезеңінде әртүрлі қоректік ортаға ұшырағанын және 50-60 жыл бойы бақылауда болған жағдайларды табу қиын. Режимнің аяқталуы бізге осындай ерекше эксперимент жасауға мүмкіндік берді», – деп атап өтті Калифорнияның Оңтүстік университетінің экономисі Тадея Грачнер.

Мәліметтерге сүйенсек, өмірінің алғашқы 1 000 күнінде қант мөлшерлеуіне ұшыраған балалар ересек жасқа келгенде 2-типтегі қант диабетімен ауыру қаупі 35%-ға, ал гипертензия қаупі 20%-ға төмендеген. Тіпті бала құрсақта болғанда мөлшерлеу тоқтатылған жағдайларда да денсаулыққа пайдасы байқалған. Қант мөлшері шектелгендердің арасында аталған аурулардың кеш басталу ықтималдығы жоғары болған.

«Қызығы, соғыс кезіндегі қантқа қатысты шектеулер қазіргі ұсынымдармен сәйкес келеді. Біздің зерттеуіміз ата-аналар осы ұсыныстарды сақтаса, олардың балаларының денсаулығына айтарлықтай оң әсер етуі мүмкін екенін көрсетеді», – дейді Макгилл университетінің экономисі Клэр Бун.

Зерттеу тікелей себеп-салдар байланысын дәлелдей алмағанымен, бұл қантты ерте тұтынудың денсаулыққа зор ықпал ететінін дәлелдейтін маңызды айғақ. Ғалымдар келесі қадам ретінде қант пен қатерлі ісік сияқты басқа аурулар арасындағы ықтимал байланыстарды зерттемекші.

«Ерте кезеңдегі қант тұтынуды темекі сияқты қарауымыз керек, яғни тағам өндірушілерге нәрестелерге арналған азықтарды пайдалырақ етіп шығаруын талап етуіміз қажет», – деп атап өтті Калифорния университетінің экономисі Пол Гертлер. «Сонымен қатар, балаларға бағытталған қантты азықтарды салық салу және жарнамалауды реттеу қажет».