Әлем халқының 60%-дан астамы 4 негізгі қоректік заттың жетіспеуінен зардап шегеді – зерттеу

Бұл зерттеу әлемдік денсаулық сақтау саласы үшін маңызды ескерту болып отыр.

Әлем халқының 60%-дан астамы төрт негізгі қоректік заттың жетіспеушілігінен зардап шегеді. Бұл зерттеу The Lancet Global Health журналында жарияланды.

Жақында жарияланған зерттеу нәтижелері бойынша, әлем халқының екіден үш бөлігі күнделікті тамақтану рационынан төрт негізгі дәрумен мен минералды жеткілікті түрде алмайды. Гарвард университетінің Т.Х.Чан атындағы Қоғамдық денсаулық сақтау мектебі, Калифорния университетінің ғалымдары және Жаһандық тағамды жақсарту альянсының (GAIN) зерттеушілері жүргізген бұл зерттеу әлемдік денсаулық сақтау саласы үшін маңызды ескерту болып отыр.

Ғалымдар деректерді Глобалдық тағамтану дерекқорынан алып, статистикалық модельдерді қолдану арқылы әлемнің 185 еліндегі халықтың 99,3 пайызының қоректік заттармен қамтамасыз етілу деңгейін бағалады.

«Бұл нәтижелер алаңдатарлық», – дейді GAIN-нің ғалым-диетологы Тай Бил. «Адамдардың көпшілігі, барлық аймақтарда және кез келген табыс деңгейіндегі елдерде бұрын ойлағаннан да көп, көптеген маңызды микроэлементтерді жеткілікті мөлшерде алмайды». 

Тізімдегі бірінші элемент – йод. Ол тироксин гормонын өндіру үшін қажет және жүрек, ми, салмақ және жасушалар қызметінің қалыпты жұмысын қамтамасыз етеді. Йод теңіз өнімдері мен сүт тағамдарында кездеседі, алайда 68 пайыз адам оны жеткілікті мөлшерде қабылдамайды.

Екінші орында – Е дәрумені. Оның жетіспеушілігі адамдардың 67 пайызында байқалады. Е дәрумені жаңғақтарда, жұмыртқада бар және ағзаның инфекцияларға төзімділігі мен жасушааралық байланысты нығайтуда маңызды рөл атқарады.

Үшінші орында – кальций. Ол сүйектер мен тістердің беріктігін қамтамасыз етуге, жүрек, бұлшық ет және жүйке жүйесінің дұрыс жұмыс істеуіне қажет. Кальций сүт өнімдері мен жапырақты көкөністерде кездеседі, бірақ адамдардың 66 пайызының рационында оның мөлшері жеткіліксіз.

Төртінші орында – темір. Оның жетіспеушілігі 65 пайыз адамның тамақтануында байқалады. Темір бауырда, қызыл етте және бұршақ тұқымдастарында кездеседі, ол гемоглобин өндіру үшін маңызды. Темірдің жетіспеушілігі тез шаршауға және бас ауруларына алып келуі мүмкін.