Халықтық штаб: Атом электр стансасынан көмірқышқыл газ бен күл шықпайды
Ақылбек Күрішбаев АЭС экологиялық таза энергияның сенімді көзі ретінде маңызды рөл атқаратынын атап өтті.
Ұлттық Ғылым академиясының президенті Ақылбек Күрішбаев АЭС экологиялық таза энергияның сенімді көзі ретінде маңызды рөл атқаратынын атап өтті. Оның көміртекті энергия көздеріне тәуелділікті азайту арқылы қоршаған ортаға тигізетін оң әсерін егжей-тегжейлі түсіндірді.
«Біздің энергетикамыздың 70 пайызы көмір стансасының негізінде жұмыс істеп тұр. Олардың барлығы тозған. Оның үстіне көмір электр стансасының экологияға зияны бар. Мысалы 1 ГБ энергия шығаратын көмір стансасы 3-7 миллион тонна көмірқышқыл газын, 300 мың тонна күл шығарады. Бұның ішінде зиянды қосындылар да бар. Енді біз қандай жағдайда өмір сүріп жатқанымызды ойланып көрейік. Сондықтан әрбір мемлекет осындай көмір стансаларын жабатын болады. Ал АЭС-нан көмірқышқыл газы, күл шықпайды. Сондықтан жасыл энергияға жатады», - деді ол.
Мектептің физика пәнінің оқытушысы Аманжол Бақтығұлов еліміздегі ғылыми-техникалық прогрес мәселесін атом электр стансасының құрылысымен байланыстырды. Сондай-ақ ол АЭС-тың тиімділігіне тоқталды.
«Мен радиоактивтілік және атом құрылысы жөніндегі ілімнің негізін салушы Эрнест Резерфордтың теорияларын жата-жастана оқыған мамандардың бірімін. Атомшы болмасам да, физик ретінде елімізде АЭС салудың тиімді тұстарын біліп отырмын. АЭС құрылысы түрлі ғылыми саладағы зерттеулерді жетілдіруге серпін береді. Жастардың жаңа бағытта ізденуіне, тың мамандықты игеруге құлшынысы оянатыны анық», - деді ол.
Өзге де ұстаздар тың бастамаға бірауыздан қолдау білдіріп, энергия ел экономикасын қозғаушы күші деген ортақ пікірге келді.