Қазақстан АЭС салу арқылы энергетикалық тәуелсіздікке қол жеткізеді
Ақтөбе мен ШҚО тұрғындарына АЭС құрылысының маңызы түсіндірілді.
Сенат депутаты Амангелді Нұғманов атом электр станцияларын ешбір энергия көздерімен алмастыруға келмейтінін айтты.
«Қазіргі уақытта еліміздегі электр станцияларының 70 пайызы көмірмен қуаттандырылады. Алайда көмірдің де, газдың да шектеуі бар. Ал күннен қуат алатын құрылғылар 8-10 жылға жарамды. Оны қайтадан салуға көп қаражат қажет. Сондықтан да АЭС салуға талпынып жатырмыз. Ол – баламасы жоқ қуат көзі», – деді Амангелді Нұғманов.
«AMANAT» партиясының облыстық филиалы төрағасы Ербол Данағұловтың айтуынша, АЭС салу арқылы Қазақстан энергетикалық тәуелсіздікке қол жеткізіп қана қоймай, жаңа жұмыс орындарын ашып, экономикасын әртараптандыруға мүмкіндік алады. Жобаны іске асыру теміржол саласындағы мәселелерді шешуге де ықпал етеді.
«Мемлекет басшысы өз Жолдауында көлік-логистика саласын дамытуға ерекше назар аударды. Алдағы уақытта теміржол саласына кешенді реформалар жүргізіледі. Яғни темір жолдар салу, жаңа пойыздар, вагондар сатып алу, цифрландыруды енгізу және басқа да мәселелерді шешу көзделген. Мұның бәрі электр энергиясына қажеттілікті арттырады. Сондықтан АЭС құрылысы еліміздің энергетикалық қауіпсіздігі мәселесін ғана емес, теміржол саласындағы мәселелерді шешеді», – деді Ербол Данағұлов.
Қазір Ақтөбе облысының темір жол саласында 14 мыңнан астам адам еңбек етеді. Оның 4500-і Ақтөбе, Қандыағаш қалаларында. Поездар құрастырып, темір жол салып, жүк және жолушылар тасымалымен айналысып жүрген еңбек адамдары елімізде теміржол желісін электр энергиясымен қамтудың деңгейі төмен екенін көріп-біліп жүр. Сондықтан да олар АЭС салудың қажеттілігін түсініп, қолдау білдірді.
Сондай-ақ, АЭС салуды қолдау бойынша Шығыс Қазақстан облысына қарасты Тарбағатай аудандық Халықтық штаб мүшелері Нурпеисов Болат Жұмабекұлы, Боғырбаев Асқар Жұмашұлы және Аудандық «Тұғырлы Тарбағатай» газетінің редакторы Үсенов Ернар Ақжар ауылындағы аудандық ауруханасының қызметкерлерімен кездесті.
Кездесуде энергетика жетіспеушілігінің алдын алудың ұтымды жолы - АЭС құрылысының маңызы талқыланды.
«Елдің ертеңін ойласақ, болашақтағы қуат тапшылығын болдырмауды ескерсек Қазақстанға АЭС салу маңызды. Қазірдің өзінде қуат тапшылығы еліміздің оңтүстік өңірлерінде сезілуде»,- деді аудандық Халықтық штабтың мүшесі Болат Нурпеисов.
Елдің энергетикалық жүйесінің тұрақтылығы мен қауіпсіздігін қамтамасыз ету үшін жаңартылатын энергия көздері мен атом электр станцияларын салудың қаншалықты тиімді әрі пайдалы екені туралы түсіндірілді. Қойылған сұрақтарға нақты жауаптар берілді.
Шара соңында аурухана қызметкерлері АЭС салуды қолдайтынын және референдумға барып, таңдау жасайтындықтарын айтты.