Халықтық штаб Қостанай облысында кәсіпкерлерге референдумның маңызын түсіндірді
Кездесу спикерлері ретінде Серік Бектұрғанов, Жанар Қуайшинова және Игорь Белобржицкий АЭС салудағы аймақ үшін болашақ жоспарларымен бөлісті. 6 қазанда өтетін АЭС құрылысы бойынша референдум тәуелсіз Қазақстанның болашағы үшін стратегиялық маңызға ие іс-шара болмақ. Әлемнің алдыңғы қатарлы елдерінің тәжірибесі атом энергетикасының тиімділігі мен қауіпсіздігін айқын дәлелдейді. Қазіргі уақытта Қазақстан электр энергиясының тапшылығын сезініп отыр және оны көрші елдерден импорттауға мәжбүр.
Кәсіпкерлер тақырыпқа үлкен қызығушылық танытып, сұрақтар қойып, өз ойларымен бөлісті. Кездесуге 30 адам қатысты, олардың әрқайсысы еліміздің энергетикасының болашағы туралы пікірталасқа өз үлесін қосты.
Өз кезегінде штаб мүшесі Серік Бектұрғанов Мемлекет басшысының «Әділетті Қазақстан: заң, тәртіп және экономикалық даму» атты Жолдауында көтерілген әлеуметтік-экономикалық мәселелерді атап өтті. Сонымен қатар, АЭС құрылысы мәселесі бойынша жалпыұлттық референдум өткізудің маңыздылығына ерекше назар аударды.
«Мемлекет басшысы халықтың пікірін ескере отырып, маңызды шешімдерді қабылдайды. Жолдауында да осыған ерекше тоқталды, елімізде АЭС салу мәселесі тек қоғаммен кеңесе отырып, 6 қазанда өтетін референдум арқылы шешілуі тиіс. Осылайша, елдің энергетикалық жүйесінің тұрақтылығы мен қауіпсіздігін қамтамасыз ету үшін жаңартылатын энергия көздері мен атом электр станцияларын дамытуды біріктіру оңтайлы стратегия болмақ», – деді Серік Бектұрғанов.