Колледждерге бөлінетін грант саны артты

Бұл туралы Премьер-Министр Олжас Бектенов айтты.

2024 жылы бюджет есебінен колледждерге 142,5 мың студент қабылданды. Бұл 2023 жылмен салыстырғанда 1,5 есеге көп, деп хабарлайды turkystan.kz.

 Үкімет отырысында Премьер-Министр жұмысшы мамандықтары үшін кадр даярлау сапасын арттыру бойынша қабылданып жатқан шаралардың жеткіліксіз екенін атап өтті. Осы бағыттағы жұмыстардың негізгі міндеттері белгіленді.

«Халықаралық салалық стандарттар мен  сертификаттауды белсенді түрде енгізу қажет. Ол үшін Оқу-ағарту министрлігі жұмыстың сапасына тәуелсіз бағалау жүргізуі керек. Сондай-ақ  технологиялық көшбасшыларды айқындай отырып, колледждерді кәсіби бейімдеу мен саралауды аяқтауы қажет», — деді О.Бектенов.

Соңғы жылдары кәсіптік техникалық білім беру жүйесін дамытуда бірқатар прогрессивті қадамдар жасалды, атап айтқанда, колледждер жұмысшы мамандықтары бойынша тегін оқытады, студенттерінің стипендиялары 50%-ға өсті, кадрлар даярлауға арналған мемлекеттік тапсырыс көлемі айтарлықтай ұлғайды. Мәселен, бұған дейін колледждерге бюджет есебінен  жыл сайын 93 мыңға жуық студент қабылданып келсе, 2024 жылы олардың саны 142,5 мыңға дейін жетті.