Кезінде Қазақстанға ғылыми конференцияға келген 54 жастағы Юрий Образцов есімді ғалымды әлдебіреулер ұрлап әкетіп, ауылда мал бақтырып қойған. Бұл туралы КТК арнасы хабарлады.
Юрий Образцовтың қорқынышы әлі басылмаған. Жан-жағына жатырқай қараған физик-ғалым енді туған еліне қайтқанша асық. Айтуынша, үш жыл бұрын Алматыдағы ғылыми конференцияға келген оны әлдебіреулер ұрлап әкетіп, содан бері малдың соңына салып қойған. "Теміржол бекеті маңында таксиге отырған едім. Күтпеген жерден ауылдан бір-ақ шықтым. Алғашында түк түсінгенім жоқ. Сөйтсем, мені ұрлап әкетіпті", - дейді Юрий Образцов. Құлдыққа жеккендер оны үш жыл бойы аямай жұмсапты. Қарсы шыққан күндері басын күрекпен жарған. Құлағын жырып, мұрнын сындырып, өзін қорада ұстаған. Жолы болып қашып шыққан ресейліктің көп нәрсе есінде жоқ. Айтуынша, құл ұстаушылар әбден ұрып ақылынан адастырып жіберіпті. "Себеппен де, себепсіз де ұра берді. Малға дұрыс қарамасам тепкінің астына алатын. Тамақ беруді кейде ұмытып кетіп жүрді. Иттің табағынан қалғанды жеуге тура келетін", - дейді ол. Есінде тек аты-жөні және Новосибирск қаласынан келген ғалым екені қалған. Құлдықтан әрең қашып құтылған оған тек мейірімді жандар көмектесіп, туған жеріне дереу хабар жіберіпті. Сөйтсе, академик алдамапты. Ұшты-күйлі жоғалған физикті туыстары табанынан таусылып іздеп, ендігі өлдіге де санаған екен. Ауылда қой бағып, құлдыққа жегілген академик енді бірер күннен кейін отбасына оралатын болды. Ресей консулының өзі Юриймен кездесіп, құжатын бір күнде жасап берді. «Үш жыл бойы құлдықта болдым» деген Ресей азаматы үш күннен кейін «Алматы-Новосибирск» әуе рейсімен еліне қайтады. Ал өзін құл қылғандардың атын, ауылдың атауын академик нақты айта алмай отыр. Есінде тек «Исмаил, Вова» деген екі есім ғана қалыпты. Айтуынша, ол екеуі де әлгілер күштеп ұстап отырған құлдар екен. Бұл іспен қазір тәртіп сақшылары айналысуда.Ресейлік академик Қазақстанда 3 жыл бойы құлдыққа жегілген
Ресейлік академик Қазақстанда 3 жыл бойы құлдыққа жегілген
