Рыбакина Торонто турниріне де қатыспайды

Одан кейін қандай жарыстарға қатысатындары әзірге белгісіз

Қазақстанның бірінші, әлемнің 4-ракеткасы Елена Рыбакина 6 тамызда басталатын Торонто (Канада) WTA 1000 турниріне қатысудан бас тартқан, деп жазады turkystan.kz ҚазАқпаратқа сілтеме жасап.

Қазақстан теннис федерациясынан түскен мәліметке қарағанда, Е.Рыбакина да, Юлия Путинцева да қазіргі кезде ем алуды жалғастыруда.

Сондықтан екеуі де Торонто додасына бара алмайды. Әсіресе, Юлияның жарақаты ауырлау.

Одан кейін қандай жарыстарға қатысатындары әзірге белгісіз.

Федерацияның түсіндіруінше, Торонто сияқты ірі турнирлерге барлық жетекші теннисшілер WTA талаптарына сәйкес бір-екі ай бұрын өтінім жібереді. 

Егер ойнай алмайтын болса, онда теннисшінің командасы ресми түрде бас тарту үшін медициналық құжаттарды жарыс ұйымдастырушыларына тапсырады.