Шымкентте 2,5 млн теңгенің велосипедтерін ұрлаған тұрғын видеоға түсіп қалды

Ол бұрын ұрлық жасағаны үшін сотталған қала тұрғыны болып шықты.

Шымкентте 2,5 млн теңгенің велосипедтерін ұрлаған күдікті құрықталды. Ұсталған азаматтың бұрын сотты болғаны анықталды, деп хабарлады turkystan.kz.

Бірнеше айдың ішінде күдікті 21 тұрғынды екі дөңгелекті темір тұлпарсыз қалдырған. Келтірілген шығынның жалпы сомасы – 2,5 млн теңгеге жуық.

«Қаскөй көпқабатты үйлердің кіреберісіне кіріп, баспалдақ алаңында қалдырылған велосипедтерді ұрлаумен айналысқан. Ал дөңгелекті құлыптау құрылғыларын қысқышпен кесіп жүрген. Күдіктіні тәртіп сақшылары бейнебақылау камераларының көмегімен анықтады», - делінген ІІМ-нің хабарламасында.

Ол бұрын ұрлық жасағаны үшін сотталған қала тұрғыны болып шықты. Рецидивист қамауға алынды.

Әл-Фараби АПБ тергеушілері барлық айғақты жинап, қылмыстық істі сотқа жолдады.

«Бұл заңсыз әрекеті үшін ер адам 2 жылдан 7 жылға дейiнгi мерзiмге бас бостандығын шектеуге, не сол мерзімге бас бостандығынан айыруға жазалануы мүмкін», - делінген хабарламада.