Театр мен музей қызметкерлері тасқыннан зардап шеккендерге гуманитарлық көмек көрсетті

Қазақстан аймақтарында су тасқынынан зардап шеккендерге көмек көрсету жұмыстары жалғасып жатыр. Елдің мәдени ошақтары да бұл игі істен тыс қалмады.

Жамбыл атындағы Қазақ мемлекеттік филармониясының қызметкерлері Атырау облысына гуманитарлық жүк жіберді, деп хабарлады turkystan.kz.

Қалибек Қуанышбаев атындағы Қазақ мемлекеттік академиялық музыкалық-драма театры, республикалық мемлекеттік корей музыкалық комедия театры, «Жастар» театры, «Бозоқ» мемлекеттік тарихи-мәдени музей-қорығының ұжымдары бір күндік табысын қайырымдылық қорларға аударды.

«Астана Опера» театры жеке гигиена құралдары мен азық-түлік жинап, Астана қаласындағы қабылдау пункттеріне тапсырып, ортақ іске үлес қосты. Бірнеше шығармашылық ұжым концерттен түскен қаражатты «Biz birgemiz Qazaqstan» қорына аударуды жоспарлап отыр. Олардың қатарында ҚР «Салтанат» мемлекеттік би ансамблі, Абай атындағы Қазақ ұлттық опера және балет театры және басқалары бар.