Алматыдан Атырауға қосымша әуе рейстері ашылды

Air Astana әуе компаниясы гуманитарлық көмекті тегін тасымалдайтынын хабарлады.

Атырау облысындағы су тасқыны жағдайына байланысты қосымша рейстерді енгізу туралы шешім қабылданып отыр, деп хабарлады turkystan.kz.

9 сәуірде Air Astana әуекомпаниясы Airbus A321 ұшағымен Алматыдан Атырауға және кері KC 8770 және KC 8780 қосымша рейстерін орындайды.

«Авиалайнердің сыйымдылығы 179 орын, Алматыдан Атырауға ұшып кету уақыты 17.00-де. Кері рейс 21.15-те жүзеге асырылады. Қосымша рейстерді енгізу туралы шешім Атырау облысындағы су тасқынына орай осы бағыттағы сұраныстың артуына байланысты қабылданды», - делінген хабарламада.

Авиабилеттерді әуекомпанияның сайтынан, Air Astana қосымшасынан немесе Брондау және ақпарат орталығынан сатып алуға болады.

Сонымен қатар, Air Astana еріктілер ұйымдарынан гуманитарлық көмекті тегін тасымалдауға арналған өтініштерді қабылдайды.