Мемлекеттік сатып алу туралы шарттардың орындалуы қоғамдық бақылауға алынады
Мемлекеттік сатып алу рәсімінің жалпы ұзақтығы 2 айдан 1 айға дейін қысқарады.
Мәжіліс жаңа редакциядағы «Мемлекеттік сатып алу туралы» заң жобасын бірінші оқылымда мақұлдады. Жоба мен оған ілеспе түзетулер Мемлекет басшысының мемлекеттік сатып алудың сапалы жаңа жүйесін құру жөніндегі тапсырмасын орындау мақсатымен әзірленді. Заң жобасына сәйкес әсіресе құрылысқа байланысты жұмыстарға қоғамдық мониторинг институты енгізіледі.
Мемлекеттік сатып алу (goszakup.gov.kz) веб-порталына жұмыстарды орындау кестелерін, шарттардың орындалуы бойынша есептерді (оның ішінде фото және бейне жазба) жалпы қолжетімді етіп жариялау ұсынылады. Қоғамдық бақылау субъектілері мемлекеттік сатып алу туралы шарттардың орындалуын бақылауға құқылы болады. Мониторинг «Қоғамдық бақылау туралы» заңда көзделген тетіктерге сәйкес жүргізіледі. Норма ашықтықты арттырып, сыбайлас жемқорлық тәуекелдерін төмендетуге бағытталған.
Мемлекеттік сатып алу туралы жаңа заң жобасы процесті оңайлатуға және бюрократиядан арылтуға бағытталған.
Осы саладағы мәселелердің бірі – рәсімдердің ұзақтығы. Осыған байланысты алдын ала қабылдау кезеңін алып тастау, сондай-ақ жеке рәсімдерді өткізу мерзімдерін қайта қарау ұсынылады. Нәтижесінде мемлекеттік сатып алу рәсімінің жалпы ұзақтығы 2 айдан 1 айға дейін қысқарады. Конкурсқа қатысуға бір өтінім ұсынылған және оны біліктілік талаптарына сәйкес деп таныған жағдайда, мұндай сатып алу өткізілді деп саналады.
Сонымен қатар әлеуетті жеткізушілердің рейтингін енгізу ұсынылады.
Жаңа редакцияда шағын және орта бизнес субъектілері арасында жүзеге асырылатын жұмыстардың, қызметтердің, тауарлар мен сатып алулардың тізбесін енгізу ұсынылады. Осыған орай жұмыс жүргізіліп жатқан ауданда тіркелген өнім берушілерге 1 пайыздық шартты жеңілдік қарастырылған.
Өз кезегінде Ерлан Қошанов мемлекеттік сатып алу жүйесін қайта қарау мәселесі бірнеше жылдан бері көтеріліп келе жатқанын атап өтті. Ол мемлекеттік сатып алу барлық әлеуметтік маңызды жобаны жүзеге асыруға тікелей әсер ететіндіктен Мемлекет басшысы бұл саланы түбегейлі реформалауды тапсырғанын еске салды.
Кәсіпкерлердің, орталық және жергілікті мемлекеттік органдардың, қоғам өкілдерінің қатысуымен Мәжілістегі жұмыс тобының аясында заң жобасын әзірлеу жұмыстары жалғасады.