Атырауда прокурордың бас киімін киген блогер сотталды
Сот қаулысы заңды күшіне енген жоқ
Атырауда сот 26 жастағы блогерге айыппұл салды. Оған прокурордың бас киімін заңсыз кию себеп болған. Бұл туралы «Ақ жайық» басылымы жазды, деп хабарлады turkystan.kz Халық үніне сілтеме жасап.
Атырау қаласының әкімшілік құқықбұзушылық істер жөніндегі мамандандырылған соты азамат Ж.-ға қатысты ҚР ӘҚБтК-нің 675-бабы 1-бөлігімен («Әскери киімнің айырым белгілері және (немесе) рәміздері бар киімді заңсыз кию») әкімшілік құқықбұзушылық туралы істі қараған.
Блогер сот шешімімен кінәлі деп танылды. Оның жеке басын және жасалған әкімшілік құқықбұзушылықтың сипатын ескере отырып, 18 460 теңге көлемінде әкімшілік айыппұл салынды. Сот қаулысы заңды күшіне енген жоқ.