Биыл елімізде төрт ауқымды жоба қолға алынады – Президент
Мемлекет басшысының айтуынша, әлеуметтік жағынан осал топтағы азаматтар үшін несие өсімі 7 пайыздан аспайды.
Президент Қасым-Жомарт Тоқаев биыл елімізде төрт ауқымды жоба қолға алынатынын жеткізді.
Ол бұл туралы қазақстандықтарды Наурыз мейрамымен құттықтауында айтты.
Атап айтқанда, көптеген жылу орталығы және инженерлік желілер жаңғыртылады, 12 мың шақырым жол салынып, жөнделеді.
Сонымен қатар 300 мың адам табиғи газдың игілігін көре бастайды және ауыл мен аудан тұрғындары үшін жаңа тұрғын үй бағдарламасы іске қосылады.
Мемлекет басшысының айтуынша, әлеуметтік жағынан осал топтағы азаматтар үшін несие өсімі 7 пайыздан аспайды. Ал жалға берілетін баспана саны бірнеше есе көбейеді.