Елімізде «Жас ғалымдар академиясы» құрылады
Академияның жаңа миссиясы мен негізгі алғышарттар бар.
Бұл туралы ҚР Президентінің жанындағы ҚР Ұлттық ғылым академиясының Президенті Ақылбек Күрішбаевтың Назарбаев Университетінде Қазақстан Республикасы Президенті жанындағы Ғылым және технологиялар жөніндегі ұлттық кеңес мүшелерімен және Астана қаласы ЖОО, ҒЗИ басшыларымен болған кездесуде белгілі болды.
Кездесуге еліміздің жетекші ғалымдарымен бірге жас ғалымдар да көп жиналды. Іс-шара барысында ғалымдардың отандық ғылымды дамытудың өзекті мәселелерін шешу жөніндегі ұсыныстары мен олардың Ұлттық ғылым академиясының жаңа миссиясына көзқарастары тыңдалады.
Оның айтуынша, Академияның жаңа миссиясы мен негізгі алғышарттар бар. Ол қатарға отандық жетекші ғалымдардың күш-жігерін бір арнаға біріктіру, Қазақстан Республикасының ғылыми-техникалық даму бағыттарын барлық мүдделі тараптардың сындарлы талқылауы үшін тиісті жағдай жасау және ғылыми потенциалды іс жүзінде олардың нәтижесі айқын сезінетіндей нақты міндеттерді шешуге бағыттау болмақ. Сонымен қатар, Академия талантты жастарды тарта отырып, экономика мен қоғамның дамуына елеулі интеллектуалдық үлес қосуға қабілетті тәжірибелі ғалымдардың басын қосатын ғылыми орталыққа айналдыру көзделіп отыр.
Кездесу барысында тағы бір маңызды бастама талқылауға түскенін айта кеткен абзал. ҚР Ұлттық ғылым академиясы ғалымдардың ғылыми әлеуетін көтере отырып жас ғалымдардың басын бір арнада тоғыстыратын құзыреті бар орталық құрудың да маңыздылығы турасындағы пікірлер жиын барысында ғалымдардың өздері тарапынан көтерілді.
Жиынды қорытындылаған Ақылбек Күрішбаев, соңғы 30 жыл ішінде ғылымды қаржыландырудың тиімді құралдарымен нәтижеге бағытталған бірде-бір маңызды даму стратегиясы ұсынылмағанын атап өтті.
Бердібек Қабай