Жамбыл мен Қызылорда облыстарында жолдар жабылды
Бұл туралы «ҚазАвтоЖолдың» баспасөз қызметі мәлім етті.
Ауа райының қолайсыздығына (қалың қар, боран және көрінудің шектелуі) байланысты «Батыс Еуропа — Батыс Қытай» халықаралық көлік дәлізінің Тараз қаласынан Түркістан облысының шекарасына дейінгі (534-593 шқ) бөлігі жабылды.
Сонымен қатар «Меркі-Шу-Бурылбайтал» автожолының 161 шақырымынан (Бірлік ауылы) 273 шақырымына дейін (Бурылбайтал ауылы) автокөлік құралдарының барлық түріне шектеу енгізілді.
Азаматтарды эвакуациялау мақсатында автожолдардың жабық учаскелерінде уақытша жылыту пункттері құрылған, сондай-ақ, эвакуациялауға арналған техникалар дайындалған.
Қазір Жуалы ауданы Б.Момышұлы ауылындағы орта мектеп базасында орналастырылған жылыту пунктіне бұған дейін жеткізілген 25 адамның 12-сі (13-і пойызбен кеткен) орналасқан. Олар ыстық тамақ, төсек орын және өзге де қажеттіліктермен қамтамасыз етілді.
Айта кетейік, өңірдегі барлық аудандарда коммуналдық қызметтер күшейтілген жұмыс режиміне көшірілді.
Төтенше жағдайлар департаментінде жедел штабтың жұмысы ұйымдастырылып, қауырт желі іске қосылды.
Жолдарды тазалау жұмыстары жалғасуда.
«ҚазАвтоЖол» АҚ Қызылорда облысы бойынша филиалы да өңірде республикалық маңызы бар жолда көлік қозғалысына шектеу қойылғанын мәлімдеді.