Алмат Досмұхамедов «AMANAT» партиясы Қостанай облыстық филиалының төрағасы болып сайланды
Қостанай облысында 262 бастауыш партия ұйымына біріктірілген 45 мыңнан астам партия мүшесі бар.
Жуырда «AMANAT» партиясы Қостанай облыстық филиалының кезектен тыс XXXVI конференциясы өтті. Жиында Алмат Досмұхамедов ашық дауыс беру арқылы филиалдың жаңа төрағасы лауазымына сайланды. Сондай-ақ іс-шара барысында партиялықтар 2023 жылы атқарылған жұмысты қорытындылап, филиалдың Саяси кеңесі мен бақылау-тексеру комиссиясының құрамына өзгерістер енгізді.
Партия Хатшысы Ержан Жылқыбаевтың айтуынша, «АМАNАТ» партиясының негізгі мақсаты – халықтың әлеуметтік жағдайын жақсарту және Әділетті Қазақстанды құру.
Былтыр партиядан сайланған барлық деңгейдегі мәслихат депутаттары білім беру, денсаулық сақтау және тұрғын үй-коммуналдық шаруашылық нысандарында 300-ге жуық кездесу ұйымдастырып, мемлекеттік органдарға 178 депутаттық сауал жолдады. Бұл туралы Қостанай облыстық мәслихатындағы «AMANAT» фракциясы төрағасының орынбасары Қырмызы Жаңбыршина мәлімдеді.
Бұдан соң, конференцияға қатысушылар өңірдегі партиялық жобалардың жүзеге асырылу барысын талқылады. Ұлттық-мәдени құндылықтарды насихаттауға бағытталған «Ұлттық мұра» жобасы аясында 57 мыңнан астам адамды қамтыған 205 іс-шара өткізілді. Мәселен, «Miras» өңірлік кеңесінің бастамасымен «Тіл тамыры – отбасы» байқауы ұйымдастырылды.
«Ардагерлерді ардақтайық» партиялық жобасы аясында 6130 адамды қамти отырып, 326 іс-шара өткізілді. Мәселен, ауылдық елді мекендерде 83 көшпелі қабылдау ұйымдастырылып, 2106 зейнеткер дәрігерге қаралды.
Кейінгі екі жылда «Жер аманаты» жобасы жүйелі жүзеге асырылып келеді. Өңірлік комиссия атқарған белсенді жұмыстың нәтижесінде пайдаланылмай жатқан немесе заңсыз бөлінген 356,3 мың гектар ауыл шаруашылығы жері мемлекет меншігіне қайтарылды.
Конференция барысында қатысушылар Альмира Жансүгірованы «AMANAT» партиясы Қостанай облыстық филиалының Бақылау-тексеру комиссиясының төрағасы лауазымына сайлады. Ал Саяси кеңестің жаңа мүшелері – Алмат Досмұхамедов және Валерий Розумович.
Айта кетейік, Қостанай облысында 262 бастауыш партия ұйымына біріктірілген 45 мыңнан астам партия мүшесі бар.