Физика заңдарын комикстің көмегімен түсіндіретін жас ұстаз
Жас маманның айтуынша, физиканы комикс арқылы түсіндіру шәкірттердің креативті ойлау қабілетін дамытады.
Семейдегі лицейлердің бірінде жұмыс істейтін физика пәнінің мұғалімі Жасқайрат Нәубетов сабақта ерекше тәсіл қолданады. Жас ұстаз комикс және компьютер ойындарының көмегімен оқушылардың бұл пәнге қызығушылығын арттырып, ынтасын оятып келеді. Шәкірттерінің шыңдалуына сеп болып жүрген Жасқайрат Нәубетовтің бұл әдісі қазір ел аузында жүр.
Абай облысының орталығы – Семей қаласында ұстаздық қызмет атқаратын Жасқайрат тың әдіспен шәкірт тәрбиелеп жүргеніне 4 жылдан аса уақыт болыпты. Осы уақыт аралығында ол талай оқушыны түрлі жарысқа дайындап, жоғары көрсеткішке қол жеткізуіне себепкер болған.
25 жастағы мұғалім Маңғыстау облысы, Маңғыстау ауданына қарасты Шайыр ауылында дүниеге келген. М.Өтемісұлы атындағы БҚМУ-ды физика мұғалімі мамандығы бойынша тәмамдап, қазір Семейдегі «Білім-Инновация» лицейінде сабақ береді.
Жас маманның айтуынша, физиканы комикс арқылы түсіндіру шәкірттердің креативті ойлау қабілетін дамытады.
Ұстаздың пікірінше, комиксті салу үшін оқушы тақырыпты зерттейді, ізденеді, креатив қосады, сабаққа қызығады.
Ол мұндай ерекше тәсілмен оқытуды 7,9-сынып оқушыларына қолданады екен. Комикстің көмегімен күрделі тақырыптарды оңай түсіндіріп жүрген ұстаздың арқасында бүгінде олимпиадаларға қатысқан оқушылар жақсы көрсеткіштерге қол жеткізуде.
Тиімді тәсілді ойлап тапқан мұғалімнің алға қойған мақсаты мақсаты айқын, межесі биік.
Айта кетерлігі, заман талабына сай креативті мұғалім үлгісін көрсетіп жүрген жас маман бар білгенін тек сынып ішінде емес, сонымен қатар, әлеуметтік желі арқылы да ортаға салады. Тіпті, оқуда озат оқушыларымен бірге қызық эксперимементтер жасап, TikTok желісі арқылы өзге оқушылардың физикаға деген қызығушылығын арттыруды мақсат етіп жүр.