Туризм және спорт министрлігі Қытайдағы Қазақстан туризмі жылын өткізуге дайындалуда
2024 жыл – Қытайдағы Қазақстан туризмі жылы деп жарияланды.
Туризм және спорт министрі Ермек Маржықпаев Қытай Халық Республикасының Мәдениет және туризм министрі Сунь Елимен кездесіп, Қытайдағы Қазақстан туризмі жылын өткізу жоспарларын және туризм саласындағы өзара ынтымақтастық одан әрі дамыту мәселелерін талқылады, деп хабарлады turkystan.kz.
Президент Қасым-Жомарт Тоқаевтың былтыр Қытайға жасаған ресми сапары барысында 2024 жыл – Қытайдағы Қазақстан туризмі жылы деп жарияланған болатын.
Ресми кездесу барысында Туризм және спорт министрлігі Қытайдың ірі қалаларында бірқатар маңызды іс-шараларды өткізу тұжырымдамасын ұсынды. Қытайдағы Қазақстан туризмі жылының ресми ашылу салтанаты наурыз айының соңына жоспарланған. Барлығы 25-тен астам түрлі іс-шаралар өткізілмек.
Мәселен, Қытай туристері былтыр Қазақстанға ең көп келген ТОП-5 елдің қатарына енді. Статистика деректері бойынша, былтырғы жылдың 9 айында Қазақстанда 75 мыңнан астам қытайлық туристке қызмет көрсетілген. Ал Қытайдан Қазақстанға келушілердің жалпы саны 200 мың адамнан асты.
Ведомство басшысы былтыр екі ел арасында визасыз режим енгізілгенін және биыл тікелей рейстер санын аптасына 30-ға дейін ұлғайту жоспарын ескере отырып, туристік ағынның одан әрі артуы мүмкін екенін атап өтті.
Сондай-ақ кездесу барысында тараптар туризм саласындағы маркетинг және инвестиция тартуды, елдердің туристік ұйымдары арасындағы өзара ынтымақтастықты күшейтуді, сондай-ақ тәжірибе алмасуды талқылады.
Жиын соңында Ермек Маржықпаев ШЫҰ-ға мүше мемлекеттердің туристік әкімшіліктері басшыларының алдағы кездесуіне қатысу үшін Сунь Ели мырзаны Қазақстанға шақырды.