Алаш зиялыларының бейнесін жіппен кестелеген шебер

Қазір қиялға ерік берсе, қылқаламсыз-ақ сурет салуға болатынын дәлелдеп жүргендер жетерлік. Қарағандылық Берік Қарашолақов кейінгі 5-6 жылдан бері Алаш зиялылары мен әдеби тұлғалардың портретін жіппен кестелеп, жұрт ықыласына бөленіп жүр. Суретшінің талайды тәнті еткен теңдесіз туындылары ізденістен туған. 

Берік Амантайұлы Қарағанды облысы Үштөбе ауылындағы орта мектепте көркем еңбек пәнінен сбақ береді. 40 жылға жуық уақыт ұстаздық етіп келе жатқан ол алғашында бұл тәсілдің қалай атайтынын білмегенін айтады.

Шебер тұлғалардың суретін салмас бұрын жан-жақты зерттейді.

Берік Амантайұлы бір туындысына бір ай уақыт жұмсайды. 7-8 түсті жіпті қолдана отырып, екі планда салады. Бірінші планда – негізгі кейіпкер, екінші де – бір түсті фон. Автордың айтуынша, фон адамның мінез-құлқын, тегін білдіреді.

Негізгі детальдарын салып біткен соң, екінші пландағы дүниелерді шәкірттеріне тіктіреді екен. Айта кету керек, Берік Амантайұлының осы іске баулып отырған 10 шақты шәкірті бар. «Үйренгім келеді» келеді деген оқушылар саны аз емес.

Шебердің бұған дейін көз майын тауысып, қыруар уақытын сарп еткен 30 шақты туындысы бар. Оған 300 мыңға жуық метр жіп қолданған. Сондай-ақ олардың ешібірі сатылымға шығарылмайтынын атап өтті. Оған себеп – алаштықтардың ұстанымдарын қазіргі қоғамға насихаттау.

Суретші қазір Ақселеу Сейдімбектің портретін әзірлеп жатқанын айтты. Сондай-ақ арнайы тапсырыспен салатын суреттері де бар. Шамамен бір картинаның не портреттің құны 70-80 мың теңгеге бағаланады екен. Ол ең бастысы жұмысына міндетті түрде істелуге тиіс жұмыс деп емес, керсінше ләззат алатын сүйікті ісі ретінде қарайтынын айтып жеткізді.