Ақмола полицейлері қар құрсауында қалған 900-ге жуық көлікке жол бастап жүрді
Батальон мен патрульдік полиция ротасының экипаждары күшейтілген режимде қызмет етеді.
Ақмола полицейлері қар құрсауында қалған 900-ге жуық көлікке жол бастап жүруді 2 сағат ішінде ұйымдастырды, деп хабарлады turkystan.kz Polisia.kz сайтына сілтеме жасап.
Қазіргі уақытта патрульдік экипаждардың сүйемелдеуімен жеңіл және жүк көліктерінен жасалған колонналар елорда бағытында қозғалысын жалғастыруда. Ауа райына байланысты Ақмола өңірінде Көкшетау қаласы мен Астананың айналасындағы барлық бағыттар бойынша автокөліктің барлық түрлері үшін қозғалыс шектелген.
8 қаңтарда Алматы – Екатеринбург, Астана – Петропавл, Астана – Қарағанды, Астана – Ерейментау – Шідерті, Көкшетау – Рузаевка халықаралық және республикалық маңызы бар автожолдарды, сондай-ақ облыстық және жергілікті маңызы бар жолдарды жабу туралы шешім қабылданды.
Сағат 13:00-де полицейлер Астана қаласына дейін 530 бірлік (460 жеңіл, 70 жүк) автокөліктің бірінші колоннасын ілесіп алып жүруді бастады. 350 көлік құралының тағы бір колоннасы кері бағытта жүріп келеді. Күні бойы полицейлер көліктерді ілестіріп алып жүруді жалғастырады.