Қарағандылық жас ғалымдар жаңа препараттар ойлап тапты
Белгілі боксшы Мұхаммед Әли ауырған бұл дертке әлем елдері шипа іздеуде.
Қарағандылық жас ғалымдар паркинсон бас-ми ауруына қарсы препарат жасап шығарды, деп хабарлады turkystan.kz qazaqstan.tv арнасына сілтеме жасап.
Белгілі боксшы Мұхаммед Әли ауырған бұл дертке әлем елдері шипа іздеуде. Қазір ғылыми қызметкерлер өздері ойлап тапқан дәрілік заттарды зерттеу, жетілдірумен айналысуда. Жаңа ғылыми жетістіктерге қол жеткізу үшін жас ғалымдар шетелде білімдерін шыңдап келген.
Жанат Көшенов бастаған бір топ жас ғалымдар соңғы уақытта паркинсон бас-ми ауруына қарсы препаратты жетілдіруде. Ол үшін шетелдік ғылыми және өндірістік орталықтарда зерттеу-өңдеу жұмыстарын меңгерген.
Жаңа препараттарға қажетті биологиялық шикізат негізінен өсімдіктерден алынады. Әсел Аманжан ғылыми орталықта 8 жылдан бері жұмыс істейді. PhD-докторанты елімізде өсетін өсімдіктер арасынан табиғи шикізат көздерін зерттеп, биологиялық белсенді қосылыстарды бөліп алуда үлкен жетістіктерге қол жеткізген білікті маман. Ол дәрі өндіруге қажетті субстанциялардың жаңа түрлерін сынақтан өткізу үшін шетелдің ғылыми-зерттеу институттарымен үнемі байланыста.
Еліміз бәсекеге қабілетті болу үшін ғылым өндірістің жаңа технологияларына бағытталуы тиіс.Мұны жас ғалымдар жақсы түсінеді. Бүгінде Мемлекет басшысының тікелей бастамасымен ғылыми ізденістерге қолдау зор,-дейді олар. Сол себепті соңғы кездері орталықта жұмыс істейтін 100-ге тарта жас маман ғылымды өндіріске енгізіп,кәдеге жарату бағытында тынбай ізденіп, үлкен нәтижелер көрсетіп жүр.