«AMANAT» жанындағы кеңес: Ғылымның насихаты кемшін

«AMANAT» партиясы жанындағы Білім беру мен денсаулық сақтау мәселелері жөніндегі республикалық кеңестің кезекті отырысы өтті. Онда Мемлекет басшысының «Адал азамат» тұжырымдамасы негізінде ұлттың жаңа сапасын қалыптастыру үшін білім берудің барлық деңгейінде атқарылып жатқан істер, партияның сайлауалды бағдарламасын жүзеге асыру барысы және отандық ғылымды қолдау мәселелері талқыланды.

Мемлекет басшысының «Әділетті Қазақстанның экономикалық бағдары» атты Қазақстан халқына Жолдауында «Әркім отаншыл, білімпаз, еңбекқор, тәртіпті, адал, әділ, үнемшіл әрі жанашыр болса, алынбайтын асу жоқ. Абайдың «Толық адам» ілімінен бастау алатын «Адал азамат» тұжырымдамасының түпкі мәні – осы» деп атап көрсетті.

Осы орайда Оқу-ағарту министрлігі мектепке дейінгі, жалпы орта, техникалық және кәсіптік білім беру ұйымдарының тәрбие мазмұнына «Біртұтас тәрбие бағдарламасын» енгізді. Оқу-ағарту вице-министрі Еділ Оспанның айтуынша, бағдарлама ұлттық, адами құндылықтарға негізделген.

Бұл ретте Сенат депутаты, Кеңес мүшесі Ақмарал Әлназарова халықаралық тәжірибеде білім саласындағы әлеуметтік қызметкердің рөлі айрықша екенін атап өтті.

Бұған қатысты вице-министр «Біртұтас тәрбие бағдарламасын» жүзеге асыру үшін қосымша сағаттар енгізілмегенін, ол мектептегі тәрбие сағатының аясында жүргізілетінін жеткізді.

«AMANAT» партиясының Сайлауалды бағдарламасын жүзеге асыру бойынша Жол картасының балаларға арналған қосымша білім беруді ұйымдастыру мәселесіне қатысты баяндама жасаған Еділ Оспан бүгінде елімізде 11 мыңнан аса балалар сауықтыру орталығы жұмыс істеп тұрғанын жеткізді. 2023-2026 жылдар аралығында Жол картасы аясында еліміздің аймақтарында бірнеше сауықтыру орталығын пайдалануға беру жоспарланып отыр. Оның ішінде Түркістан облысында – 5, Абай облысында 4 нысан, ал Ақмола, Ақтөбе, Алматы, Атырау, Жамбыл, Қарағанды, Маңғыстау, Ұлытау облыстары мен Шымкент қаласында 3 орталықтан іске қосылады. Батыс Қазақстан, Жетісу, Қызылорда, Павлодар облыстары және Алматы қаласында 2 орталықтан ашылса, Астана қаласы, Қостанай, Солтүстік Қазақстан, Шығыс Қазақстан облыстарында бір ғана нысаннан іске қосылмақ.

Бұл ретте Кеңес мүшелері жоғары оқу орындары базасынан ашылатын сауықтыру орталықтарындағы қауіпсіздік шараларына алаңдаушылық білдірді. Ал министрлік өкілі осыған дейін балалар лагерінде орын алған жағдайлар бұл саланың ешқандай мемлекеттік орган тарапынан реттелмей келуімен түсіндірді. Вице-министр оқу-сауықтыру орталықтарындағы балалармен жұмыс істейтін мамандарға, қауіпсіздікке қатысты талаптар күшейтіліп жатқанына сендірді.

Отандық ғылымды қолдау мәселесіне қатысты сөз алған Ғылым және жоғары білім вице-министрі Талғат Ешенқұлов Мемлекет басшысының тапсырмасы бойынша жас ғалымдарды қолдау күшейтілгенін алға тартты. Оның айтуынша, жас ғалымдардың зерттеулерін гранттық қаржыландыруға арналған конкурстардың нәтижесінде 913 жоба іске асырылуда.

Өз кезегінде Мәжіліс депутаты, Кеңес төрағасы Жұлдыз Сүлейменова, Мемлекет басшысының жас ғалымдарды қолдауға қатысты нақты міндет қойғанын алға тартып, осы бағытта қандай жұмыс атқарылып жатқанын сұрады.

Ғылым және жоғары білім министрлігі Ғылым комитеті төрағасының орынбасары Асылхан Бибосыновтың айтуынша, жас ғалымдарды қолдау бойынша бірнеше бағытта жұмыс атқарылып жатыр.

Дегенмен, Кеңес мүшелері бүгінде жас ғалымдарға көрсетілетін қолдау, оларды қоғам танып, ашқан жаңалықтарынан жұртшылық хабардар болуы үшін атқарылып жатқан жұмыстар жеткіліксіз деп есептейді. Сондықтан да аманаттықтар жас ғалымдарды, осы саладағы реформаторларды қоғам танымайды, жас ғалымдардың ортақ платформасы жоқ, ғылымның насихаты кемшін деген мәселелерді ведомство өкілдеріне жеткізді.