23 жастағы жігіт елордалықтарға жалған концерт билеттерін сатқан

Алматы ауданының полиция бөліміне алданған 8 азамат жүгінген.

Алаяқ астаналық тұрғындарға концертке жалған билет сатқан, деп хабарлады turkystan.kz Polisia.kz сайтына сілтеме жасап. 

Қазіргі уақытта Алматы ауданының полиция бөліміне алданған 8 азамат жүгінген. 

«Жедел-іздестіру іс-шаралары барысында қызметкерлер Ақтөбе облысының 23 жастағы тұрғынының қатысы барын анықтады. Жігіт OLX хабарландыру қызметін пайдаланып, әйгілі әншінің концертіне билеттер сатқан. Билеттердің құны 10 мың теңгеден 45 мың теңгеге дейін болған.  Сатып алушылар төлемдерді банктің мобильді қосымшасы арқылы жіберген. Сатушы билетті WhatsApp арқылы жіберуге уәде берген», - делінген хабарламада.

Алайда алданған азаматтар ақыры билеттерін алмағанын айтып, полицияға хабарласқан. 

Қазіргі уақытта ҚР ҚК-нің 190-бабы 2-бөлігі (Алаяқтық) бойынша сотқа дейінгі тергеу амалдары жүргізіліп жатыр. Полицейлер елорда аумағында жасалған алаяқтықтың осыған ұқсас фактілеріне қатысы бар-жоғын тексеріп жатыр.