Жауырын сүйекті «сөйлеткен» суретші Бектас Кәрімұлы

Қазақ жауырын ұстап болашақты болжаған. Ал Бектас Кәрімұлы қара малдың жауырын сүйегіне ойып та, жонып та сурет салады және көркем туындылар жасайды. Turkystan.kz тілшісі бұл сирек өнердің қыр-сыры жайлы шебердің өзімен әңгімелескен болатын.  

Бектас Кәрімұлы Ақмола облысы Шортанды ауданындағы Мәдениет үйінде суретші болып істейді. 18 жыл бұрын Моңғолия елінің Баян-Өлгей өңірінен көшіп келген.

Жауырын сүйектің жалпақ болуы суретшінің шеберлігін толық жеткізе алады  және ол халқымызда ерекше мәнге ие. Сондықтан да шебер осы жауырын сүйекті таңдаған екен.

Бір туындыға бас-аяғы шамамен 1-3 апта кетеді екен. Туынды тақырыбы мен қиындығына қарай әртүрлі мерзімде әзір болады екен.

Қазір ол тек ара-тұра, бос уақытында айналысады. Себебі оның арнайы шеберханасы жоқ.

Қолөнерші Моңғолияда «театр сахна суретшісі» мамандығын оқып бітірген.

Қазір Бектас Кәрімұлы Түркияда кезекті көрмесінде туындыларын таныстырып жүр.

Бұған дейін Б.Кәрімұлы 2017 жылы 5 мемлекет қатысқан Моңғолиядағы көрмеде бас жүлде алып, АҚШ-қа жолдама ұтып алған. Алайда Америкаға белгілі бір себептермен бара алмай, тек жұмыстарын жіберген. Одан бөлек Ресейдің Таулы Алтай, Магадан қаласында, Өзбекстанда жүлделі болып, қазақтың құндылықтары мен салт-дәстүрлерін бір ғана сүйекпен әлемге таныстырып келген.

Қолдан жасалған ерекше бұйымды сатып алушылар жоқ емес. Ол шетелдегі көрмелерге қатысып жүргеннен кейін, басқа елдерден де сұраныс көп болады дейді.

Шебердің әзірге сүйекті «сөйлететін» шәкірттері жоқ, бірақ  суретшілікке баулып отырған біршама оқушысы бар. 62 жасқа келген суретшінің осы өнерді өзінен кейінгі жастарға үйретіп, атадан ұрпаққа жетсе деген арман-ниеті бар.