Алматы облысында аш күйінде табылған 6 жасар баланың қазіргі жағдайы белгілі болды

Алматы облысының әкімі үйінен аш күйінде табылған баланың қазіргі жағдайын айтты.

Алматы облысының әкімі Марат Сұлтанғазиев Іле ауданында бірнеше күн нәр тартпай, аш күйінде табылған 6 жасар баланың қазіргі жағдайын айтты, деп хабарлады turkystan.kz Halyq Uni-не сілтеме жасап.

Бұған дейін Алматы облысының прокуратурасы мен жергілікті полиция «Бақытты және қауіпсіз балалық шақ» акциясы аясында Іле ауданында үйінде аш жатқан 6 жасар баланы тапты. Оның сөйлеуге, жүруге шамасы болмаған. Дәрігерлер балаға пневмония диагнозын қойып, ол шұғыл түрде ауруханаға жатқызылды.

Алматы облысының әкімі үйінен аш күйінде табылған баланың қазіргі жағдайын айтты.

«Ол 3 жасына дейін қарапайым балалар сияқты дамыған. Бірақ кейін баланың ақыл-есінің дамуы тежелген. Қазір ол емделіп жатыр. Әрине, тұрған жері өте нашар: үйінің ұйқы-тұйқысы шыққан, ол жерде мысық қаптап жүр және жағымсыз иіс жайлаған. Анасы баласына қарамаған. Бала бейтаныс адамдардан ғана емес, анасынан да қорқады. Қазір баланы дәрігерлер мен психологтар қарап жатыр», - деді облыс әкімі.

Айта кетейік, Алматы облысында «Бақытты және қауіпсіз балалық шақ» акциясы аясында 51 ата-ана әкімшілік жауапқа тартылды. Оның ішінде баласына қамқор болмайтын, дұрыс тәрбиелемейтін жауапсыз ата-аналарды балаларынан айырып (15 бала), сотқа ата-ана құқығын шектеу туралы 7 шағым жолданды.