Қызылорда тұрғыны полиция қызметкеріне пышақ ала жүгірген (ВИДЕО)

Күдікті басқарманың уақытша ұстау изоляторына қамауға алынды.

Қызылордада полиция қызметкеріне шабуыл жасаған жергілікті тұрғын құрықталды, деп хабарлады turkystan.kz.

Полиция қызметкерлері «Құқықтық тәртіп» операциясы барысында күдікті көлікте тыйым салынған заттардың бар-жоғын тексергенде 21 жастағы жолаушы қалтасынан өсімдік заты салынған газет бумасын шығарып, жерге лақтырып жіберген.

«Ұстау кезінде жолаушы полицейлерге қарсылық көрсетіп, заңды талаптарын орындамай, жиналмалы пышақпен оларға қарай ұмтылған», – делінген Polisia.kz сайтының хабарламасында.

Осы дерек бойынша ҚР ҚК-нің 296-бабының 2-бөлігімен (Есiрткi, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау) және ҚК-нің 380-бабының 3-бөлігімен (Билік өкіліне қатысты қорқыту немесе күш көрсету әрекеттері) сотқа дейінгі тергеп-тексеру әрекеттері жүргізіліп жатыр.

Күдікті басқарманың уақытша ұстау изоляторына қамауға алынды. Сараптамалар тағайындалды.