Жетісу облысындағы филармонияға Дәнеш Рақышевтің есімі берілді
Сондай-ақ халық әртісі тұрған үйге ескерткіш-тақта орнатылды.
Жетісу облыстық филармониясы енді Қазақстанның халық әртісі, әнші-композитор Дәнеш Рақышевтің есімімен аталатын болды. Сондай-ақ Талдықорғандағы өнер саңлағы тұрған үйге ескерткіш-тақта орнатылды.
Жетісулық жезтаңдай әнші Дәнеш Рақышев қазақ музыкасының қоржынына 150-ден астам Әсеттің әндерін, халық әндерін, басқа да халық композиторлары мен қырғыз әндерін, Қазақстан композиторларының және 100-ге жуық өз әнін асқан шеберлікпен орындап, қалдырды. 1986 жылы «Қазақ ССР-нің халық әртісі» жоғарғы атағына ие болған. Жетісуда Дәнеш Рақышевтің есімі әншілік-орындаушылық мектебін қалыптастырушы тұлға ретінде тарихта қалды. 1990 жылдары Талдықорғандағы қазақ мектеп-интернатында және Жетісу мемлекеттік университеті музыка факультетінде өз класын ашып, талапты балалар мен жастарды әншілікке баулыды.
Жетісу облысының филармониясына Дәнеш Рақышевтің есімінің берілуіне орай халық әртісі тұрған үйге ескерткіш-тақта орнатылып, «Жетісу дүлдүлі» атты мерекелік концерт ұйымдастырылды.