Елімізде жеке куәліктің көшірмесін жинауға тыйым салынады

Сенатор Андрей Лукинның сөзінше, мәжіліс депутаттары бастамашы болған заң жеке деректерді қорғауды күшейтуге бағытталған.

Бүгін Сенат депутаттары "Ақпараттық қауіпсіздік, ақпараттандыру және цифрлық активтер туралы" заңды екінші оқылымда мақұлдады.Түзетулердің бірі – жеке куәліктердің көшірмесін жинауға тыйым салу.

Сенатор Андрей Лукинның сөзінше, мәжіліс депутаттары бастамашы болған заң жеке деректерді қорғауды күшейтуге және цифрлық тау-кен қызметін реттеудегі құқықтық алшақтықты жоюға бағытталған. 

"Қазақстанның төрт кодексі мен он заңына өзгертулер мен толықтырулар енгізілуде. Атап айтқанда, мемлекеттік органдардың және мемлекеттік заңды тұлғалардың ақпараттандыру объектілерімен интеграцияланбаған, субъектіні технологиялық құралдарды пайдалана отырып анықтау мүмкін болмаған жағдайларды қоспағанда, жеке басын куәландыратын құжаттардың көшірмелерін жинауға және өңдеуге тыйым салынады. Иммигранттар ұлттық мүдделерді қорғау және елдің ұлттық қауіпсіздігін қамтамасыз ету үшін жеке басын куәландыратын құжаттардың көшірмелерін ұсынуға міндетті", - делінген хабарламада.

Заңда ақпараттық қауіпсіздікті зерттеушілермен өзара іс-қимыл бағдарламасын жасау арқылы ақпараттық қауіпсіздікті қамтамасыз етудің жаңа тетіктерін енгізу де қарастырылған.

Цифрлық тау-кен өндіру қызметін жүзеге асыруға лицензиядан айыру, тоқтата тұру, қайта ресімдеу тәртібі айқындалады. Алаяқтық әрекеттерден қорғау мақсатында жеке тұлғаларға "электрондық үкімет" веб-порталы арқылы банктік несиелер мен микронесиелерді алудан өз еркімен бас тарту құқығы берілген.

Келесі кезекте заң мемлекет басшысына қол қоюға жіберіледі.