Елордалық колледжде инклюзияны қолдау кабинеті ашылды
Бүгінгі таңда колледжде ерекше білім беру қажеттіліктері бар 98 студент білім алады.
Қазақстандық Швейцария-Америка колледжінде Дүниежүзілік балалар күні аясында инклюзияны қолдау кабинеті ашылды, деп хабарлады turkystan.kz елорда әкімдігінің сайтына сілтеме жасап.
Елордалық Білім басқармасының басшысы Қасымхан Сенғазиевтің ақпараты бойынша, елорданың кәсіптік білім беру саласында алғаш рет инклюзияны қолдау кабинеті ашылды. Осыған дейін тек мектептер мен балабақшаларда болатын.
Швейцария-Америка колледжінің жетекшісі Гүл Жанаева бүгінгі таңда білім беру мекемесінің қабырғасында ерекше білім беру қажеттіліктері бар 98 студент білім алатынын атап өтті.
Оның айтуынша, инклюзивті білім беру үшін жағдай жасау колледж қызметінің басым бағыттарының бірі болып қала береді. Оларға оқыту процесін жақсарту үшін техникалық және әлеуметтік жағдайлар жасалды: пандустар, колледжге кіре берісте және дәретхана кабиналарында тұтқалар, тактильді тақтайшалардан жасалған жолдар, инвотаксиге арналған тұрақ және т.б. орнатылды.
Астананың Бала құқықтары жөніндегі уәкілі, елорда әкімінің штаттан тыс кеңесшісі Асима Бимендина қала тұрғындарын Дүниежүзілік балалар күнімен құттықтап, бұл бүкіл адамзат үшін маңызды күн екенін атап өтті.
Педагог-психологтар, логопед-мұғалімдер, әлеуметтік педагогтар, педагог-ассистенттер жұмыс істейтін кабинеттердің миссиясы – ақпараттық және коммуникативтік кедергілерді жою, ерекше білім беру қажеттіліктері бар балаларды колледж өміріне сіңдіру үшін қолайлы жағдайлар жасау. Еліміздің басқа да колледждерінде осындай кабинеттер ашу жоспарланып отыр.