2025 жылдан бастап елімізде әскери қызметтің жаңа түрі пайда болады
Қорғаныс министрлігі әзірлеген заң жобасында әскери қызметтің жаңа түрі – резервтегі қызметті енгізу ұсынылды.
Әскери қызметтің жаңа түрі – резервтегі қызмет елімізде 2025 жылы пайда болуы мүмкін. Тиісті заң жобасы бүгін Мәжілістің жалпы отырысында бірінші оқылымда мақұлданды.
Қорғаныс министрлігі әзірлеген заң жобасында әскери қызметтің жаңа түрі – резервтегі қызметті енгізу ұсынылды.
Бұл тұрғылықты жері бойынша келісім-шарт негізіндегі әскери қызметтің ерікті түрі.
Жоба Қазақстан Республикасының кәмелетке толған азаматтарына қатысты болады. Қызметке қабылдау ерікті түрде жүзеге асырылады.
Іріктеу кезеңдерінен өткен азаматтармен Қорғаныс министрлігі 3 жылға келісім-шарт жасасады. Соның негізінде олар ай сайын бөлімдерде қысқа мерзімді оқудан және ведомствоның бұйрығы бойынша 30 күндік жиындардан өтеді.
Резервшілерге денсаулық жағдайы бойынша талаптар қойылады және жас шектеулері белгіленеді: офицерлер үшін – 60 жасқа дейін, сержанттар мен сарбаздар үшін – 18-ден 50 жасқа дейін.
Бүгінгі таңда заң жобасына сәйкес, олар мерзімді қызметтен немесе қысқа мерзімді әскери дайындық курстарынан өткен, жоғары оқу орындары жанындағы әскери кафедраларда оқыған адамдар болады деп қарастырылуда.
Резервшілер әскери бөлімдерде дайындықты жүзеге асырады, оларға қару-жарақ пен жауынгерлік техника бекітіледі. Олар тек өз облысының аумағында қызмет етеді.