Қосылған құн салығы: Салық саясатында бизнес пен мемлекет мүддесінің теңгерімі ескерілуі тиіс
2025 жылы қосылған құн салығын 12%-дан 16%-ға өсуі мүмкін.
Сенатор Ләззат Рысбекова министрлер кабинеті бизнеске салық ауыртпалығын ұлғайтпайтын балама нұсқа ұсынуы тиіс екенін мәлімдеді, деп хабарлайды Turkystan.kz.
Депутат қосылған құн салығы 12%-дан 16%-ға дейін өссе шағын және орта бизнестің қадамына тұсау салынуы мүмкін екенін айтты.
Депутат салық саясатында бизнес пен мемлекет мүддесінің теңгерімін ескеру керек екенін мәлімдеді. Оның сөзінше, фискалды іс-шаралар шағын бизнесті нығайтуға, яғни ірілендіруге бағытталуы тиіс.
Айта кетейік, Қазақстан 2025 жылы қосылған құн салығын 12%-дан 16%-ға, яғни 4%-ға, ұлғайтуды жоспарлап отыр. Ұлттық экономика министрлігі ілгерілетіп жатқан бастамаға «Атамекен» ұлттық кәсіпкерлер палатасы қарсы. Ұлттық палатадағылар қосылған құн салығының мөлшерлемесін ұлғайту емес, керісінше 12%-дан 10%-ға дейін төмендету қажет деп санайды.
Бизнес субъектілері мен депутаттар тарапынан қарсылыққа тап болып жатса да, Ұлттық экономика министрі Әлібек Қуантыров алған бетінен қайтқысы келмейді. Ол «Атамекен» ұлттық кәсіпкерлер палатасының ұсынысын қолдамайды.
Естеріңізге салайық, елімізде шағын және орта кәсіпкерлікті дамытудың 2030 жылға дейінгі тұжырымдамасы іске асырылып жатыр. Кәсіпкерлерге жан-жақты және кешенді қолдау көрсетілуде. Шағын және орта бизнесті тексеруге 3 жыл мораторий жарияланған. Мораторий 2023 жылдың соңына дейін қолданыста болады.