Кеңсай зиратындағы халық әртістерінің қабірі тоналды
Ұрылар ұлылар жатқан Кеңсай зиратына да қол салды.
Мәмбетов пен Жұбанованың бейітін тонағандарды ұстауға Алматы полициясы бар күшін жұмылдырды. Қола құлыншақтың жоғалуына байланысты қозғалған қылмыстық іс ІІМ бақылауында, деп хабарлады turkystan.kz.
«Алматы» арнасының мәліметінше, бірнеше күн бұрын атақты режиссер Әзірбайжан Мәмбетов пен композитор Ғазиза Жұбанованың немерелері марқұмдардың қабіріндегі ескерткіштің жоғалғанын хабарлаған.
100 гектарды алып жатқан Кеңсай зиратында бұған дейін де ұрлық болған. Бұл жолы қарақшылар халық әртістерінің қабірін тонап кетті. Қылмыс қашан жасалғаны әзірге белгісіз. Бірақ бұл әрекет режиссер Әзірбайжан Мәмбетов пен композитор Ғазиза Жұбанованың немерелері дабыл қаққанда ғана мәлім болды.
Марқұмдарға Құран бағыштауға келгенде бейіттегі қоладан құйылған құлыншақ көрінбеген.
Тоналған қабірде ерлі-зайыпты Мәмбетов пен Жұбанова және олардың 3 жасында көз жұмған Ахан есімді ұлы жерленген. Марқұмның туыстары бұл бейіт бұрын да тоналып еді дейді. Ол кезде құлыншаққа тимеген, алайда марқұмдардың тас ескерткішін сыпырып кеткен. Бұл деректі зират күзетшілері де жасырмады.
Кеңсайды 10-нан астам адам күзетеді. Алайда бүгін көбі көрінбеді, оларды полиция сұрақ-жауап алуға шақырып алыпты. Қазір оқиғаға қатысты ауқымды тергеу жүріп жатқан көрінеді.
Тарихта қалған кісілердің қабірін тонағандар ұсталса, оңай құтылмайын деп тұр. Олардың бұл әрекетіне қылмыстық іс қозғалып қойған. Құзырлы орган өкілдері мұндай ұрлық үшін кем дегенде 3 жылға бас бостандығынан айыратынын мәлімдеді.