Айсұлу Еркінбекова: «Мен Республика күні тудым»
Айсұлу Еркінбекова осы сөзді мақтанышпен айтады.
Ол осыдан 28 жыл бұрын 25 қазанда Қырғызстан Республикасында дүниеге келді. Cегіз жасқа толғанда Қазақстанға біржолата қоныс аударды. Turkystan.kz тілшісі меншікті мерекесі ұлттық мерекемен қатар келген қызды туған күнімен құттықтап, сыр суыртпақтап қайтты.
Анасы Айнұрдың ата жұртына деген аңсары мен сағынышы Айсұлудың Қазақстанға деген қызығушылығын оятқан екен. Бұл туралы ол: «Әкем – қырғыз, анам – қазақ. Атам ашаршылық кезінде Қырғызстанға жер ауып кеткен. Сол жақта өсіп, өніп, ұрпақ өрбіткен. Анам әкесіне Қазақстанға көшу туралы үнемі айтып жүретін. Атам оған: «Тұрмыс құрғаннан соң өзің көшіп барасың, ал мен жылы орнымды суытпаймын» дейтін. Атамның айтқаны айдай болды. Анамның Қазақстанға деген құштарлығы мен махаббаты жеңді. Ол қырғыз азаматын, менің әкем Еркінбекті көндіріп, Қазақстанға, атажұртына көшіп келді», – деді.
Астанада түтін түтетіп отырғандарына 20 жылдан астам уақыт болған ару әкесін Қазақстанға көшуге келістіру үшін анасы 5 жыл жалынғанын жеткізді.
Көпбалалы отбасы Қырғызстаннан Қазақстанға қоныс аударғанда Астананы бетке алған екен. Кейіпкеріміз көштің қалай түзелгенін былай баяндады: «Қазақстанға 2005 жылы көшіп келдік. Бауырларым қазақ тілін тез меңгеріп алды. Мен біраз қиналдым. Анам мәселені кітап оқыту арқылы шешті».
Айсұлудың айтуынша, ол оқыған кітабын мысыққа мазмұндауға мәжбүр болған.
А. Еркінбекова Астанадағы алғашқы жылдарын былай еске алды:
Айсұлу Қазақстанға көшіп келгенде адамдардан көрген жақсылығын жылылықпен еске алды.
Айсұлудың айтуынша, көпбалалы ана ретінде анасы үкіметтен үй алған. Бүгінде бауырлары, өзі жеке отау болып отыр.
Дизайнер мамандығын меңгерген қыз бүгінде тігін тігіп, ісмерлігімен танылып жүр.
Айсұлу кішкентай кезінен бері туған күнін тойлағанды жақсы көреді екен. Бұл туралы ол: «Ағам туған күніме үнемі тосынсый жасайтын. Ол күні үй жинатпайтын, ыдыс жуғызбайтын, тамақ әзірлетпейтін. Барлығын өзі атқаратын. Осыған байланысты туған күнімді қатты күтетінмін», – деді.
Айсұлу Республика күнімен қатар келетін меншікті мерекесін «Мен Республика күні тудым» деп ерекшелейтінін атап өтті.
Кейіпкеріміз қазақтың көк байрағын, елтаңбасын көргенде, әнұранын тыңдағанда ерекше елжірейтінін айтты.
Редакция Айсұлу Еркінбекованы бүгінгі туған күнімен, Республика күнімен шын жүректен құттықтайды. Айсұлудың арманы ақиқатқа айналып, мақсаты орындалсын деп тілеулестік білдіреді.