Ақтаудағы екі баланың өлімі: кінәлі адам қанша жылға сотталуы мүмкін?
Мамандар химиялық препараттың құрамы да белгісіз екенін айтты.
Ақтау қаласы 7-шағын ауданында орналасқан пәтерлердің бірін қандаладан құтылу үшін белгісіз препаратпен улаған. Мамандар химиялық препараттың құрамы да белгісіз екенін айтты, деп хабарлады turkystan.kz.
Mangystaumedia.kz сайтының мәліметінше, пәтер иесі оны Алматыдағы жайма базардан сатып алған. СЭС басшысы химиялық препараттың тараған аммиак концентрациясы жоғары болғанын мәлімдеді.
Эпидемиологиялық тергеу барысында төмендегі пәтерде шығу тегі мен құрамы белгісіз препаратпен дезинфекция жүргізілгені анықталды. Пәтер иесі қандаладан құтылу үшін 39 таблетка қолданған. СЭС мамандары химиялық препаратпен дезинфекция жасалған пәтерде, бүтін бір отбасы уланған пәтерде және көршілес төрт пәтерде ауа өлшемдерін жүргізген.
Пәтердегі аммиак концентрациясы ондаған есе асып түскен.
Полиция пәтерді өңдеген әйелдің кәмелетке толмаған екі баласы бар екенін атап өтті. Қазір бұл іске қатысты ҚР ҚК 304-бабы 3-бөлігі бойынша тергеу жүргізіліп жатыр. Пәтерден заттай дәлелдемелер алынып, сараптамаға жіберілген. Тергеу жүріп жатқан бап бойынша кінәлі адам 5 жылдан 10 жылға дейінгі бас бостандығынан айырылуы мүмкін. Сараптама қорытындысынан кейін процестік шешім қабылданады.