Ер адам таксистің телефонын ұрлап, банкингтегі ақшасын құмар ойынға тіккен

Шымкент тұрғыны смартфондағы онлайн-банкингтен бар ақшаны алып, құмар ойынға жұмсаған.

Шымкент тұрғыны такси жүргізушісінің смартфонын ұрлап, мобильді банкингтегі ақшасын құмар ойынға тіккен, деп хабарлады turkystan.kz Polisia.kz сайтына сілтеме жасап.

Ұрлық туралы хабарлама Тұран ауданының полициясына түсті.

«Белгілі болғандай, ер адам таксиді таңғы 5-те шақырған. Ескі танысы болып шыққан жүргізушімен ол жол бойы бұрынғы кездерді еске алып, әңгіме-дүкен құрып келеді. Жолаушыны белгіленген жеріне апарып тастаған таксист біраз уақыт өте телефонының жоқтығын байқап, полицияға шағымданған», – делінген хабарламада.

Тәртіп сақшылары жедел-іздестіру жұмыстарының нәтижесінде күдіктіні қала аумағында ұстады. Ол смартфондағы онлайн-банкингтен бар ақшаны алып, құмар ойынға жұмсағаны анықталды.

«Өзгенің 217 мың теңге қаражатын ұтылған азамат ары қарай дүкенге барып, сол банк қосымшасы арқылы бөліп төлеуге тауар сатып алған. Кейін, құны 300 мың теңге тұратын гаджетті кездейсоқ сатып алушыға 20 мыңға сатып жіберген», – делінген хабарламада.

Полицейлер тергеп-тексеру барысында жайтқа қатысты барлық дәлелдемелерді жинап, қылмыстық істі сотқа жолдады. Айыпталушы ҚК-нің 188-бабы 2-бөлімімен көзделген қылмысты жасағаны үшін кінәлі деп танылып, оған қатысты 1,5 жылға бас бостандығын шектеу түріндегі жаза қолданылды.