Өзбекстан құрамасындағы қазақ боксшы Азия ойындарында күтпеген жерден жеңіліс тапты

Руслан Абдуллаев құрлық біріншілігінің ширек финалына өте алмады.

Өзбекстан атынан сынға түсіп жүрген этникалық қазақ Руслан Абдуллаев Ханчжоуда (Қытай) өтіп жатқан Азия ойындарындағы бокс турнирінде алғашқы жекпе-жегін өткізді, деп хабарлады turkystan.kz Sports.kz-ке сілтеме жасап.

63,5 келіге дейінгі салмақта бақ сынаған Абдуллаев 1/8 финалда моңғолиялық Баатарсухиин Чинзоригпен жұдырықтасты. Нәтижесінде төрешілердің бірауыздан қабылдаған шешімімен күтпеген жерден жеңіліске ұшырады, есеп – 0:5. Үшінші раундта төреші Моңғолия боксшысына нокдаун санады.

Осылайша, Руслан Абдуллаев құрлық біріншілігінің ширек финалына өте алмады.

Айта кетейік, ол – қазіргі әлем чемпионы: биыл Ташкентте алтын алған болатын. Сонымен қатар 2022 жылы Азия чемпионы атанған.

Қарсыласына келетін болсақ, Баатарсухиин Чинзориг – 2023 жылғы әлем чемпионатының, 2017 жылғы Азия чемпионатының және 2018 жылғы Азия ойындарының күміс жүлдегері.