Ақтаудағы спортшының өлімі: оқиғаның мән-жайы белгілі болды

Марқұмның туыстары басқа өңірдегі мамандардың көмегімен тәуелсіз сараптама жүргізуді талап етті.

Ақтаулық 21 жастағы спортшы Валерия Шалнованың өліміне қатысты тың мәліметтер белгілі болды, деп хабарлады turkystan.kz Massaget.kz-ке сілтеме жасап.

Зардап шеккен тараптың адвокаты Ажар Әбділ ақтаулық спортшы Валерия Шалнова тап болған қайғылы оқиға туралы Facebook-тегі парақшасында жазды.

Адвокаттың қолында адам өлтіру оқиғасы болған шілденің 1-інен 2-сіне қараған түні түсірілген бейнетіркегіштің жазбасы бар екен.

Еске салайық, Ақтауда 2 шілде күні су арнасынан жас қыз Валерия Шалнованың денесі табылған болатын. Ол қоян-қолтық ұрыстан кәсіби түрде жаттыққан және көп жүлдеге ие болып, спорттық жарыстарға қатысқан.

Полиция Қылмыстық кодекстің 105-бабы "Өзін-өзі өлтіруге итермелеу" бойынша іс қозғап, кейін оны 119-бапқа - "Қауіпті жағдайда қалдыруға" өзгертті. Кейін құқық қорғау органдары 21 жастағы спортшының өліміне қатысты бапты Қылмыстық кодекстің 99-бабы "Адам өлтіру" деп өзгертті. Күдікті қамауға алынды.

18 шілдеде Ақтауда 21 жастағы спортшы Валерия Шалнова жерленді.