Қазақстандық ата-аналар Оқу-ағарту министрлігін сотқа берді
Сотқа жүгінген ата-аналар білім беру саласындағы жүйелі заңбұзушылықтар туралы 50 беттен тұратын ұлттық баяндама жасаған.
Астана қаласының ауданаралық сотына Қазақстанның әр өңірінен 11 ата-ана Оқу-ағарту министрлігіне қатысты талап-арыз жолдады. Бұл туралы ата-аналардың мүддесін қорғайтын белгілі адвокат Жангелді Сүлейманов мәлімдеп, қазақстандық ата-аналардың неге қол жеткізгісі келетінін айтты, деп хабарлады turkystan.kz Tengrinews.kz сайтына сілтеме жасап.
Оқушылар былтырғы оқу жылын әдеттегідей 25 мамырда емес, 31 мамырда аяқтады. Мектеп мұндай жаңашылдыққа дайын болмағандықтан, бұл өзгеріс көптеген ата-ананың наразылығын тудырды. 1 қыркүйек қарсаңында соңғы қоңырау бұрынғы күнге қайтарылатыны жарияланды. Алайда, Сүлеймановтың айтуынша, мәселе әлі шешілмеген.
Жангелді Сүлеймановтың айтуынша, сотқа жүгінген ата-аналар білім беру саласындағы жүйелі заңбұзушылықтар туралы 50 беттен тұратын ұлттық баяндама жасап, Президент әкімшілігіне жолдаған. Олар құжатта білім сапасы төмен екені, мектептерде оқушылар көп екені, жуынатын бөлмелер болмауы сияқты 29 заңбұзушылықты көрсеткен. Дәл осындай заңбұзушылықтар Оқу-ағарту министрлігіне қатысты сот ісінде көрсетілген.