Оралда есірткі тасымалдаумен айналысқан оқушы ұсталды

Тексеріс кезінде 44 қылмыс және 55 қылмыстық әрекет анықталды.

Оралда синтетикалық есірткі затын сату үшін жасырын орындарды ұйымдастырумен айналысқан 16 жастағы оқушы ұсталды, деп хабарлады turkystan.kz.

1 маусым мен 31 қазан аралығында республика аумағында «Қарасора – 2023» жедел-профилактикалық іс-шарасы өтіп жатыр.

Polisia.kz сайтының мәліметінше, іс-шара өткізу барысында Полиция департаментінің қызметкерлерімен 94 есірткі қылмысына қатысты құқықбұзушылық анықталды. Оның ішінде 44 қылмыс және 55 қылмыстық әрекет анықталды.

«БҚО ПД Есірткі қылмысына қарсы іс-қимыл басқармасының және Орал қалалық ПБ қызметкерлері жасырын орындарды ұйымдастырумен айналысқан 16 жастағы қала мектептерінің бірінде оқитын 11-сынып оқушысын қолға түсірді. Ол қылмыс үстінде ұсталды. Жеке тінту кезінде ішінде ерекше иісі бар ұнтақ зат салынған жасыл түсті изолентамен оралған 2 қаптама табылып, тәркіленді. Оқушының телефонын тексеру кезінде жасыру орындарының координаттары анықталды. Оның көмегімен ішінде арнайы иісі бар ұнтақ салынған жасыл түсті изолентамен оралған 23 қаптама тәркіленді», – делінген хабарламада.