9 баладан 32 немере, 30 шөбере сүйген отбасы

9 баладан 32 немере, 30 шөбере сүйген отбасы

Елімізде жарасымды отбасы мен өсіп-өнген өнегелі әулеттер баршылық. Бала өсіріп бақытқа, мал өсіріп байлыққа кенеліп отырғандардың бірқатары қазақтың алтын бесігі - ауылдық жерлерде тұрады. Сондай жанұялардың бірі – Қарағанды облысы Ақадыр елді мекенінде тұратын Әміре әулеті.

Әулеттің тірегі «Тыл ардагері» және «Еңбек ері» атанған Елубай Әміре мен тоғыз құрсақ көтерген «Алтын алқа» иегері Шәкітай Жұмабекқызының отасқанына биыл 65 жыл толды. Бүгінде 9 баласынан 32 немере, 30 шөбере сүйіп отырған қариялар өнегелі әулеттің қазынасы, қара шаңырақтың берекесі болып отыр. Еңбекке ерте араласқан отағасы Елубай ақсақал 30 жылдан астам уақыт жүк көлігін тізгіндеген, техниканың тілін жақсы біледі. Ал Шәкітай әжей балабақшада, мектеп асханасында, мәдениет үйінде жұмыс істеген. Сондай-ақ ерлі-зайыптылар мал шаруашылығымен де айналысқан. «Мектеп жасынан еңбек етіп, әке-шешеме көмектесуге тура келді. Ол уақытта жоқшылық болды. Үйдің үлкендері маңдайтер, қара еңбекпен ғана нан тауып жейсің, жалқау болсаң, аш қаласың деп үйретті. Зейнет жасына дейін тынбай еңбек етіп, балаларымды да солай тәрбиелеп өсірдім», – дейді Елубай ақсақал. Ақадыр – тоғыз жолдың торабында тұрған үлкен темір жол бекеті. Сондықтан Әміре әулетіндегі ағайындылардың біразы темір жолда еңбек етеді. Мәртебелі мамандыққа деген адалдықты немерелері де әдемі сабақтастықпен жалғастырып келеді. Одан бөлек, ішкі істер қызметінде жұмыс істеп, зейнетке шыққаны да бар. Бүгінде Елубай ақсақал - 89 жаста, ал жұбайы 82 жасқа табан тіреген. Бір ғасырға жуық жасаған қариялар бау-бақша өсіріп, балаларға қолғабыс етеді. Үй шаруасына да араласып, тыным таппайды. Бүгінгі күнге аман-есен жетудің бір сыры да – осы адал еңбекте дейді олар.

Айта кетейік, Әміре әулеті әлеуметтік институттың құндылығын арттырып, отбасы құндылықтарын дәріптеп келе жатқан «Мерейлі отбасы» байқауында Қарағанды облысы бойынша жеңімпаз атанды.