Ақтаудағы балабақшада еденде ұйықтаған балалардың суреті тарады
Ақтаудағы балабақшада еденде ұйықтаған балалардың суреті тарады
Ақтаудағы балабақшалардың бірінде түсірілген суреттер әлеуметтік желіде тарап жатыр. Мұнда кейбір балалар төсекте емес, еденде ұйықтаған. Сондай-ақ бір төсекке бірнеше адам жатқызылған, деп хабарлады turkystan.kz Tengrinews.kz сайтына сілтеме жасап.
Облыстық Білім басқармасының хабарлауынша, бұл мәжбүрлі түрде жасалған.
"Балабақша әкімшілігі түсіндіргендей, бұл шара мәжбүрлі түрде жасалған. Мәселен, биыл 5 қыркүйекте балаларды ұйықтатар алдында тәрбиеші жатын бөлмедегі 3 кереуеттің сынып қалғанын анықтады. Балалардың қауіпсіздігі үшін оларды басқа жерге қоюға мәжбүр болған. Сынған жиһаздар сол күні жаңасына ауыстырылды", - делінген хабарламада.
50 орынға арналған "Бесата" жекеменшік балабақшасы биыл көктемде пайдалануға берілді. Қалалық білім бөлімі бұған дейін қаладағы мектепке дейінгі мекеменің әкімшілігі мен қызметіне қатысты ескертулер, шағымдар түспегенін айтты. Сондай-ақ басқармада шағын кәсіпкерлік субъектілерін тексеруге мораторий жарияланғандықтан, тексеру жүргізуге құқы жоқ екенін де түсіндірді.