29 маусым күні Астанада «Роза Бағланова» мюзиклі өтеді

29 маусым күні Астанада «Роза Бағланова» мюзиклі өтеді

Мәдениет және спорт министрлігінің қолдауымен Р. Бағланова атындағы «Қазақконцерт» мемлекеттік концерт ұйымының «Astana Musical» мемлекеттік театры Оңтүстік Кореядағы «Daegu International Musical Festival» (DIMF) халықаралық мюзиклдер фестивалінде «Үздік халықаралық мюзикл» және «Үздік әйел бейнесі» атағын жеңіп алды. Бас жүлдеге ие болған «Роза Бағланова» атты мюзикл 29 маусым күні Астанадағы «Qazaqstan» орталық концерт залында өтеді. Сағат 19.30-да басталады. КСРО және Қазақстанның Халық әртісі, Халық қаһарманы, күміс көмей әнші, ардақты Роза Бағланованың 100 жылдық мерейтойына орай қойылған мюзикл әншінің балалық және жастық шағы, сондай-ақ соғыс жылдарындағы қиын тағдыры, шығармашылық жолының қалыптасуына негіз болған өміріндегі шешуші сәттері жайлы баяндайды. Театр өнерінің заманауи технологиялары, шығармашылық режиссерлік, музыкалық және ерекше хореографиялық шешімдер, 20-ғасырдағы танымал әндер және соғыс жылдарындағы ерекше атмосфера ешкімді бей-жай қалдырмайды. Мюзиклдің композиторы – ҚР Еңбек сіңірген қайраткері – Артур Оренбургский, саунд дизайнер – Ақжол Өмірзақов. Қоюшы-режиссері – «Astana Musical» мемлекеттік театрының көркемдік жетекшісі Есләм Нұртазин, қойылымның авторлары – Ефрат Шарипов, Шыңғыс Маман, Айдын Сахаман және Әннәс Бағдат. Халықтың сүйікті әншісі Роза Бағланованың қайталанбас өнер әлемін паш ететін рухани кештен қапы қалмаңыздар!