Топ жарған таланттар
Топ жарған таланттар
Елімізде өнертапқыш балалар саны жылдан-жылға артып келеді. Олардың ғылымды, инновацияны дамытуға деген қызығушылығы жоғары. Талантты оқушылардың инновациялық жобалары әлемдік байқаулардан да топ жарып жүр.
Биыл ақпан айында «Дарын» республикалық ғылыми-практикалық орталығы мен Ustem robotics қоры еліміздің аймақтарынан және көршілес Қырғыз Республикасы, Өзбекстаннан 1200 оқушы қатысқан Central Asia first Championship халықаралық чемпионатын ұйымдастырған болатын. Жарыс үш жас санаты First lego league Explore (6-10 жас), First lego League Challenge (10-16 жас), First tech Challenge (12-18 жас) бойынша өткізілді. Биылғы маусым энергия тақырыбына арналды. Балалар роботтарды бағдарламалап құрастырумен қатар, инновациялық жобада жұмыс істей отырып энергия саласының өзекті мәселелеріне инженерлік шешімдер шығарды. Жарыста оза шапқан 9 команда АҚШ, Үндістан, Аустралия, Мароккода өтетін дүниежүзілік чемпионаттарға жолдама алды. Соның бірі Шымкент қалалық химия-биология бағытындағы Назарбаев зияткерлік мектебінің Clutch командасы электр энергиясын өндейтін робот жасап, І-орынды иеленді. Осылайша, олар дүниежүзі бойынша АҚШ-та өтетін робототехниканың халықаралық чемпионатына жолдама алған болатын.