Сұхбаттасқан Абылайхан ЖҰМАШ
Айдос Ербосынұлы: Давид Моррельден есе қайтарғым келеді
Айдос Ербосынұлы: Давид Моррельден есе қайтарғым келеді
2022 жыл кәсіпқой бокста ел мерейін асқақтатып жүрген былғары қолғап шебері Айдос Ербосынұлы үшін ауыр жыл болды. АҚШ-та әлем чемпионы атағына ұмтылған отандасымыз алғаш рет қарсыласына есе жіберді. Жай жеңілген жоқ, нокаутқа түсті. Жарты жылға спорттан қол үзіп қалған боксшымен сұхбаттасудың сәті түсті.
– Өткен жылда кеткен өкініш ұмытылған шығар. Моррельмен жекпе-жек Айдос Ербосынұлын өзгертті ме? Шаршы алаңға қашан ораласың?
– Спортта да, өмірде де сәттілік пен сәтсіздік қатар жүреді. Бәріне жеңіл қарауды үйрендім. Жеңісті де, жеңілісті де қабылдай білген дұрыс. Үлкен спорттағы әрбір жетістікті де, сәтсіздікті бастан өткеріп, қорытынды шығара білу мықты спортшының ғана қолынан келеді. Әрине, қарсыластан нокаутпен жеңілу ешкімге де оңай тимесі анық. Қапаландым. Қай жерде қателік жібердім деп ұзақ ойландым? Мықты бола түсу үшін осындай қиындықтардан да өту керек болған шығар. Қазақта «Жағың сынса да, сағың сынбасын» деген жақсы сөз бар. Жеңісті сәттер әлі алда. Өзімді осылай жұбаттым. Қазіргі кездегі басты мақсаттарымның бірі – рингке қайта оралып, жанкүйерлеріммен қауышу.
Қараша айындағы жекпе-жектен соң шетелдік журналистер, бокс сарапшылары, отандық жанкүйерлер, бәрі-бәрі жылы сөздерін арнады. Мемлекет басшысы Қасым-Жомарт Тоқаев та қолдау білдірді. Сауль «Канело» Альварестен бастап Мұхамед Әлидің немересіне дейін, қазақстандық спортшылар да тілеулес екенін жеткізді. Бұл маған үлкен күш-қуат берді. Аллаға шүкір, көптің қолдауының, халықтың тілегінің арқасында тезірек аяққа тұрдым.
– Кубалық қарсыласыңмен реванш өткізу ойда бар ма? Сол кездесу жайлы бір сұхбатыңда «бапкерді таңдауда қателік болды, салмақ қудым» деген екенсің. Осыған қатысты не айтасың?
– WBA нұсқасы бойынша супер орта салмақтағы «тұрақты» әлем чемпионы атағы үшін болған кездесуде жеке командамның қателіктері болды. Оны мойындаймын. Бірақ жеңіліске ұшырауыма бірінші кезекте өзім кінәлімін.
Давид Моррельден есе қайтарғым келеді. Оны алдағы уақыттың еншісіне қалдырдым. Алдымен боксқа оралайын.
– Кейінгі айқасың бүкіләлемдік бокс рейтингіндегі дәрежеңе кері әсер етті ме? Айдос қазір қай сатыда?
– Жеңіліссіз серияның тоқтағанын ғана білемін. Бұған дейін 16 кездесуде жеңіске жеткенмін. Рейтингідегі орнымды қараған жоқпын. Әзірге демалыста болған соң ондай жұмыстармен бас ауыртқым келмейді.
– Шетелде жаттығып жүргенде «Канеломен» спаррингтік кездесу өткіздің. Сауль Альварестің шаршы алаңдағы өзге боксшылардан артықшылығы неде?
– Иә, бір жыл бұрын «Канелоның» Дмитрий Биволға қарсы өткен жекпе-жегіне дайындалуына көмектескен болатынбыз. Стилім қырғыз боксшысының жұдырықтасу тәсіліне келіңкірейтін болған соң менімен спарринг жасағысы келді.
Бокс әлемінде жасындай жарқылдаған Альвареспен жаттығу жасау арқылы біраз тәжірибе жинақтадым. Өзге боксшылардан артықшылығын білмедім, бірақ маған Сауль Альварестің чемпионға тән мінезі, шаршы алаңда өзін ұстауы, ширақ қимылы ерекше ұнады.
– Сенің айқастарыңа Suleimen Promotions компаниясы демеушілік ететінін білеміз. Ондағы ықпалды адамдармен қалай таныстың? Олар саған демеуші болған соң «мына жекпе-жекті нокаутпен аяқта, келесі жекпе-жекті соңына дейін жеткіз» дегендей талаптар қоя ма?
– 2018 жылы Астана қаласында Азия чемпионы белбеуі үшін болған айқаста жеңімпаз атандым. Сол жекпе-жектен кейін Suleimen Promotions компаниясының өкілдерімен жақынырақ таныстым. Жекпе-жегімді бастан-аяқ көргендерін, жақсы жұдырықтасқанымды айтты. Сол күні еліміздегі беделді промоутерлік компаниямен бірге жұмыс істеуге мүмкіндік туды. Келісімшарт жасастық. Suleimen Promotions-та менен өзге де қазақстандық бірнеше боксшы бар.
Әр боксшының кездесу алдында қарсыласына дайындаған тактикасы, жоспары болады. Соған сай жұмыс істейді, дайындалады. Шама жетсе кездесуді ерте аяқтаған жақсы ғой. Бірақ оның бәрі шаршы алаңда шешіледі. Маған демеушілерім «жекпе-жекті мына раундта аяқта немесе соңына дейін апар» дегендей тапсырма беріп көрмепті. Әр айқас алдындағы басты мақсатым – жеңіске жету.
– Қарашада жасың 32-ге келеді. Бокс қолғабын шегеге ілген соң немен айналысу ойда бар? Айдосты бапкер ретінде көруіміз мүмкін бе?
– Бәрін уақыт көрсетеді. Нақты мына жасымда бокстан кетемін, бапкер боламын деп болжам жасап, уақыттың алдына түспей-ақ қояйын. Ұзақ үзілістен кейін денсаулығымды қалыпқа келтіріп, шаршы алаңға қайта оралғым келеді. Әзірге дәрігерлердің берген ақыл-кеңесіне құлақ асып, тапсырмаларын бұлжытпай орындап жатырмын. Бәрі оңынан болғай.
– Кәсіпқой бокста жүрген отандастарымыз туралы пікіріңді білгіміз келеді? Кімдерден үміт күтесің? Ізіңнен ерген ізбасарларыңа, кәсіпқой боксқа ауысқысы келіп жүрген жас буынға айтар ағалық кеңесің.
– Ешкімді бөліп жарғым келмейді. Бәрі де мықты. Кәсіпқой бокста жүрген кез келген отандастарымыздан үміт күтуге болады. Әуесқойдан кеткісі келіп жүрген жастарға айтар кеңесім, бірінші кезекте дұрыс команда таңдай білу керек. Бұл өте маңызды. Қалғаны тәжірибемен келеді.
– Әңгімеңізге рахмет! Алдағы жекпе-жекте жеңіске жетіп, көк туды желбірететініңізге сенеміз! Жеңісті сәттеріңіз көп болсын!