قىتايدا ينتەرنەت قولدانۋشىلار سانى 710 ملن-نان اسادى

اسپان استى ەلىندە سمارتفون پايدالانۋشىلاردىڭ سانى ارتىپ، عالامتورعا تاۋەلدى تۇرعىندار كوبەيگەن. سوندىقتان قىتاي ۇكىمەتى كيبەركەڭىستىكتەگى جاسوسپىرىمدەردىڭ قۇقىعىن قورعاۋ ماسەلەسىن كۇن تارتىبىنە ەنگىزىپ وتىر. بۇل تۋرالى 24.kz ارناسى حابارلايدى.

ارنانىڭ حابارلاۋىنشا، قازىرگى ۋاقىتتا قىتايدا ينتەرنەت قولدانۋشىلار سانى 710 ميلليوننان اسادى. ونىڭ 170 ميلليونى كامەلەتتىك جاسقا تولماعان.

بەيجىڭ بيلىگى بالالاردىڭ ينتەرنەتكە بايلانىپ قالۋ ماسەلەسىمەن كۇرەستى ەرتەرەك باستادى. 2008 جىلى ينتەرنەتكە تاۋەلدىلىكتى پسيحيكالىق اۋىتقۋ رەتىندە تانىپ، ارنايى قۇجات تا بەكىتتى. وسىلايشا، ەلدە ءتۇرلى ەمدەۋ شارالارىن جۇرگىزەتىن ارنايى لاگەرلەر پايدا بولدى. وعان نەگىزىنەن شاراسى قالماعان اتا-انالار حابارلاسادى. مۇندا تەمىردەي ءتارتىپ ورناتىلعان.  لاگەرگە تۇسكەندەر قارا جۇمىسپەن اينالىسادى. قىتايدا ينتەرنەتكە دەگەن قۇمارلىقتى وسىلاي باسادى. ءتىپتى، ەلەكتركونۆۋلسيۆتىك تەراپيا، تومەن جيىلىك يمپۋلسپەن ەمدەۋ، ياعني توقپەن سوقتىرۋ تاسىلدەرىن قولدانادى. جاسوسپىرىمدەر مۇنداي ساۋىقتىرۋدان جاندارى قينالاتىنىن ايتىپ شاعىمدانادى. بۇل جايت جاريا بولىپ، قىتاي قوعامىندا ۇلكەن رەزونانس تۋدىرعان ەدى. بۇل تاسىلگە دەنساۋلىق ساقتاۋ مينيسترلىگى 2009 جىلى تىيىم سالعانىمەن، ول كوپ جاعدايدا ەسكەرىلمەي كەلگەن.

ەندى جاڭا زاڭ بويىنشا ينتەرنەتكە تاۋەلدى جاستاردى ەمدەۋگە ارنالعان جەرلەردە توق سوقتىرۋ ادىسىنە مەملەكەتتىك دەڭگەيدە تىيىم سالىنباق. وسى «ۆيرتۋالدى كەڭىستىكتەگى كامىلەتتىك جاسقا تولماعاندار قۇقىعىن قورعاۋ تۋرالى» زاڭ جوباسىنا قاتىستى قوعام پىكىرىن ءبىلۋ مەرزىمى اقپاننىڭ بەسىندە اياقتالدى.

نوموفوبيا – تەلەفونسىز قالۋ قورقىنىشى. بۇل – سوڭعى بىرنەشە جىلدا پايدا بولعان ءححى عاسىر اۋرۋى. «سمارتفوندى ۇيدە ۇمىتىپ كەتىپ، ءوزىڭىزدى جايسىز سەزىنسەڭىز، توسەككە تەلەفونمەن جاتساڭىز، سىزدە نوموفوبيانىڭ بەلگىلەرى بار» دەيدى پسيحولوگتار. شەكتەن تىس سمارتفوندى سيپالاۋ سوڭى قايعىلى وقيعامەن تىنادى. سونىمەن قاتار، قازىر كوپتەگەن اتا-انالار بالالارىنا سمارتفون نەمەسە ايپاد بەرۋ ارقىلى ولاردىڭ ءبىر ءسات بولسا دا تىنىش وتىرعانىن قالايدى. ماسەلە وسىدان باستالادى.  وسىدان بىرنەشە جىل بۇرىن قىتايدىڭ چۋنتسين قالاسىندا قولىنان تەلەفونى تۇسپەيتىندەر ءۇشىن ارنايى تروتۋار اشىلدى. ويتكەنى الاقانداي ەكرانعا بايلانىپ، اينالاسىن بايقامايتىندار كوشەدە ءتۇرلى جاعدايعا تاپ بولىپ جاتادى. قالا بيلىگى بۇل ماسەلەگە قوعام نازارىن وسىلاي اۋدارۋعا تىرىستى.

ۇقساس جاڭالىقتار

Back to top button